Il-Fabbrika f’Malta, Carlo Gavazzi, se tkun qed tagħlaq b’aktar minn 130 ħaddiem mistennija jispiċċaw bla xogħol.
Dan hekk kif rapporti internazzjonali l-Ġimgħa filgħodu rrapportaw li l-kumpanija mistennija tnaqqas il-produttività tagħha fejn eventwalment se tkun qed tagħlaq għal kollox il-bibien tagħha.
Huwa mifhum li l-prodotti li kienu qed jiġu manifatturati f’Malta se jkunu qed jipproduċuhom fil-Messiku u fiċ-Ċina.
Il-fabbrika li hija bbażata f’Bulebel sa issa għadha ma ħabbritx meta se tkun qed titlaq mill-pajjiż. Sa issa il-ħaddiema jidher li m’għandhom ebda informazzjoni dwar x’se jseħħ minnhom u stqarrew ma’ Net News li jinsabu xxokkjati għal kollox li tali aħbar saru jafuha mill-midja internazzjonali.
Il-kumpanija Żvizzera fetħet il-fabbrika tagħha hawn Malta lura fl-1988 taħt Gvern Nazzjonalista fejn kompliet tespandi l-operazzjonijiet tagħha fl-1996.
Il-Gvern għadu ma ħax pożizzjoni dwar dan kollu.
