Suċċess Ħamruniż bla preċident li jista’ jiftaħ toroq ġodda għall-futbol Malti
Is-suċċess ta’ Ħamrun Spartans fl-Ewropa, fil-kompetizzjoni UEFA Conference League hu bla preċident u storiku għaliex hu l-ewwel wieħed tax-xorta tiegħu, sa mill-istaġun 1961/62 meta l-ewwel klabbs Maltin kienu ħadu sehem fil-kompetizzjonijiet tal-UEFA organizzati għall-klabbs Ewropej.
Kellhom jgħaddu 64 sena biex il-futbol Malti jiċċelebra tragward daqstant importanti, li klabb lokali jirnexxilu jissupera l-istadji kollha ta’ qabel il-fażi prinċipali ta’ waħda mill-kompetizzjonijiet tal-UEFA, u jikkwalifika għat-tieni nofs ta’ waħda mit-tliet tazzi għall-klabbs Ewropej.
Il-ħolqien tal-UEFA Conference League għen biex Ħamrun Spartans jilħqu dan it-tragward

Tajjeb li nifhmu fuq kif il-UEFA mil-2021 għażlet li terġa’ tintroduċi t-tielet kompetizzjoni Ewropea, il-UEFA Conference League b’objettivi u b’miri differenti minn kif kienet tkun organizzata t-tielet tazza fuq livell ta’ klabbs Ewropej. L-għan aħħari tal-ħolqien tal-UEFA Conference League kien sabiex il-UEFA żżid il-possibiltá li aktar timijiet minn pajjiżi li normalment ma jiksbux suċċess fil-UEFA Champions League u l-UEFA Ewropa League, jibdew iduqu għall-ewwel darba mill-esperjenza ta’ kompetizzjoni li tintlagħab fuq format simili għal dawk tat-tnejn l-oħra, u jkollhom opportunitá li jibbenefikaw minn prize money akbar.
Hu fatt li bil-ħolqien ta’ din il-kompetizzjoni, timijiet minn pajjiżi żgħar bħal Malta, jew aħjar timijiet minn assoċjazzjonijiet membri tal-UEFA b’ranking baxx, ikollhom iċ-ċans jipparteċipaw f’stadji avvanzati ta’ kompetizzjoni Ewropea. B’dan il-mod timijiet, fosthom dawk Maltin, setgħu jibdew jaspiraw għal kwalifikazzjoni storika għall-fażi tal-gruppi (kif kienet sa żewġ staġuni llu) u għall-fażi ta’ Kampjonat (kif inhu l-format tal-kompetizzjoni llum).
Ikun inġust jekk b’xi mod jew ieħor, nagħtu l-impressjoni li qed innaqsu mil-mertu ta’ riżultati preċidenti li timijiet Maltin kisbu f’staġuni differenti u kontra avversarji bil-wisq aktar ikkwotati minnhom, li iżda dawn ma kellhomx l-istess riżultat bħal dak ta’ Ħamrun Spartans għaliex ma kienx hemm format ta’ kompetizzjoni li jaġevola l-parteċipazzjoni ta’ klabbs minn pajjiżi li jinsabu l-isfel fir-rankings tal-FIFA.
Fil-ħames sena mit-twaqqif ta’ dan it-trofew, sa fl-aħħar kelna klabb Malti li kien kapaċi, sforz l-abiltajiet kollha tiegħu kif ukoll l-investiment li għaraf jagħmel, jikseb kwalifikazzjoni għal stadju li qatt qabel ma konna kapaċi naslu għaliħ, partikolarment fiż-żminijiet fejn il-kwalifikazzjoni għal din il-fażi ta’ kwalunkwé kompetizzjoni Ewropea, kienet bil-wisq diffiċli għal klabb Malti.
Ħamrun Spartans issa se jilagħbu sitt partiti oħra bejn Ottubru u Diċembru ta’ din is-sena

Bir-rebħa kontra RFS tal-Latvja, b’aggregate ta’ 3-2, Ħamrun Spartans għamluha għal mal-aħħar 36 tim tal-UEFA Conference League u issa se jkunu qed jilagħbu f’sitt partiti oħra fl-istadju li jmiss, dak tal-Kampjonat.
Il-format jaf jidher wieħed kompless, iżda fil-veritá jekk jiġi spjegat b’mod simplifikat, malajr tifhmu. Minn issa ‘l quddiem, l-istadju ta’ Kampjonat hu ekwivalenti għal dak li wieħed isib fil-UEFA Champions League u l-UEFA Ewropa League. Dan ifisser li jkollok klassifika waħda bejn it-timijiet kollha, iżda kull tim ma jilgħabx kontra kulħadd, iżda jilgħab biss f’sitt match days bejn Ottubru u Diċembru ta’ din is-sena. Wara dan l-istadju, kif jiġri fiż-żewġ kompetizzjonijiet l-oħra tal-UEFA, il-format tal-kompetizzjoni jinbidel f’stadji ta’ knock-outs sakemm naslu għall-finali li tiddetermina t-tim rebbieħ tal-kompetizzjoni għal dak l-istaġun.
Illum se jsir it-tlugħ tal-poloz u se jkunu magħrufa s-sitt timijiet avversarji ta’ Ħamrun Spartans
It-tlugh tal-poloz, sabiex ikunu magħrufa t-timijiet li Ħamrun Spartans se jilgħabu kontra tagħhom f’din il-fażi, se jsir illum f’Monaco, fis-1pm.
Ħamrun Spartans, u l-bqija tat-timijiet l-oħra fil-UEFA Conference League, se jilgħabu kontra sitt avversarji differenti. Hawnhekk irid ikun speċifikat li ebda tim ma’ jista’ jilgħab f’din il-fażi kontra l-istess tim għal aktar minn darba u fil-proċess tat-tlugħ tal-poloz, li jsir permezz ta’ softwer awtomatizzat tal-UEFA, kwalunkwé klabb jista’ jilgħab kontra timijiet mill-istess pajjiż sa mhux aktar minn darba sal-ewwel sitt match days ta’ din il-kompetizzjoni.
Iġifieri, sabiex nispjegaw aħjar, is-36 tim li għamilha għal-League Phase tal-UEFA Conference League flimkien ma’ Ħamrun Spartans, ġejjin minn 29 pajjiż Ewropew differenti. Il-maġġoranza tal-pajjiżi, iġifieri 24 assoċjazzjoni tal-futbol fl-Ewropa, għandha rappreżentazzjoni ta’ tim wieħed f’dan l-istadju ta’ din il-kompetizzjoni. Mil-bqija hemm erba’ pajjiżi li se jkollhom rappreżentanza ta’ żewġ timijiet u pajjiż wieħed, il-Polonja li din id-darba se jkollha l-ogħla numru ta’ timijiet rappreżentattivi mill-Ekstraklasa, li se jkun ta’ erbgħa.

Għaldaqstant, jekk nieħdu l-eżempju tat-timijiet Pollaki, Ħamrun Spartans jistgħu jilgħabu biss kontra wieħed mil-erba’ timijiet li ġejjin minn dan il-pajjiż.
Is-36 tim se jkunu qed jinqasmu f’sitt pots ta’ sitt timijiet kull wieħed. Ħamrun Spartans se jkunu f’pot 6, bl-għażla tal-pots għal kull tim ġiet determinata skont il-ko-effiċjent tal-UEFA. Sintendi fil-każ ta’ Ħamrun Spartans, meta tqabbel il-ko-effiċjent tagħhom mal-bqija tas-36 tim l-ieħor f’din il-kompetizzjoni, tal-Maltin hu fost l-inqas li hemm. Hu għalhekk li Ħamrun Spartans se jkunu f’pot 6, flimkien ma’ BK Häcken tal-Iżvezja, FC Lausanne-Sport tal-Iżvizzera, CS Universitatea Craiova tar-Rumanija, FC Noah tal-Armenja u Shelbourne FC tal-Irlanda.
Mis-sitt partiti li Ħamrun Spartans se jkunu qed jilgħabu, nofshom iridu jintlagħbu f’pajjiżna u n-nofs l-ieħor barra minn dahrom.
Iżda d-domanda li bosta bir-raġun qed jistaqsu hi, quddiem dan it-tragward storiku, Ħamrun Spartans kemm se jkunu qed jieħdu flus minn fondi allokati mill-UEFA għall-klabbs?
F’termini ta’ prize money li l-UEFA qed talloka lill-klabbs kollha li se jkunu parteċipanti fit-tliet kompetizzjonijiet riservati għall-klabbs, l-ammont totali hu ta’ €3.345 biljun. Minn dan l-ammont, il-prize money allokat għall-UEFA Conference League hu biss 10% tal-ammont sħiħ, li jfisser allokazzjoni finanzjarja ta’ €300.1 miljun.
Bħala stat ta’ fatt, bir-riżultat miksub minn Ħamrun Spartans il-bieraħ filgħaxija, il-kwalifikazzjoni tagħhom għal-League Phase tal-UEFA Conference League s’issa qed tiggarantilhom l-ammont ta’ €3.17 miljun. Mingħajr dubju, dan l-ammont waħdu diġa’ hu l-ogħla wieħed li klabb Malti qatt se jkun daħal mill-parteċipazzjoni tiegħu fl-Ewropa f’staġun wieħed. Normalment meta klabb Malti kien jibqa’ javvanza fl-ewwel stadji ta’ kompetizzjoni Ewropea, sa kemm ikun eliminat, joqrob jew jissupera mhux b’tant l-ammont ta’ miljun ewro.
Dan l-ammont hu proviżjorju għaliex Ħamrun Spartans, li minn issa ‘l quddiem se jkunu qed jilgħabu mingħajr pressjoni, jistgħu jkomplu jżidu fuq l-ammont finanzjarju li għandhom garantit diġa’, skont ir-riżultati li jiksbu fis-sitt partiti li se jkunu qed jilgħabu fil-fażi ta’ Kampjonat.
Għal kull rebħa li Ħamrun Spartans jistgħu jagħmlu fl-istadju li jmiss tal-UEFA Conference, huma se jkunu qed idaħħlu €400,000 filwaqt li f’każ ta’ draw, il-Maltin se jkunu qed jibbenefikaw minn ammont ta’ €133,000 kull darba.
Jekk iridu nkunu realistiċi, it-tragward li jmiss ta’ Ħamrun Spartans għandu jkun li wara sitt partiti, huma jirnexxilhom jikklassifikaw mal-ewwel 24 posizzjoni, f’Kampjonat kompost minn 36 tim. Dan m’huwiex tragward impossibli, speċjalment meta tqis li ċ-champions Maltin se jkunu qed jilgħabu mingħajr wisq pressjoni.
Kemm il-darba dan it-tragward jiġi milħuq, f’termini finanzjarji dan ikun ifisser żieda ta’ €200,000 oħra fil-prize money ta’ Ħamrun Spartans.
Dan ifisser li kemm il-darba Ħamrun Spartans jiksbu riżultati tajbin fis-sitt partiti li se jkunu qed jilgħabu fil-fażi ta’ Kampjonat tal-UEFA Conference League, faċilment jistgħu jgħollu l-prize money tagħhom fuq staġun wieħed għal qrib l-€4 miljuni.
Pero dan kollu, f’dan l-istadju, hu kollu preżunzjoni iżda ridna nagħtukom spjega aktar sempliċi ta’ x’flus għandhom garantiti s’issa Ħamrun Spartans wara li laħqu dan it-tragward, u realistikament kemm jistgħu jżidu aktar mal-ammont li diġa’ assiguraw bil-kwalifikazzjoni tagħhom għal-League Phase tal-UEFA Conference League.

Iżda għalfejn qed ngħidu li dan is-suċċess se jibbenefika minhu l-futbol Malti kollu, u mhux biss Ħamrun Spartans?
Permezz ta’ din il-kwalifikazzjoni, il-ko-effiċjenti tal-klabbs Maltin li jilgħabu fl-Ewropa se jiżdied. Xi jfisser dan?
Sempliċi, fil-bidu ta’ staġun ta’ kompetizzjonijiet Ewropej, il-klabbs Maltin jistgħu jittamaw aktar minn qatt qabel f’polza li tkun aktar favorevoli u li tkun tista’ twassal lil aktar klabbs Maltin ikomplu javvanzaw aktar stadji ta’ dawn il-kompetizzjonijiet tal-UEFA.
Iżda mhux hekk biss. Il-fondi li jirċievu l-klabbs tal-Malta Premier, u ta’ kull staġun jitqasmu bejn it-12-il tim tal-Kampjonat, se jiżdied u jista’ jibqa’ jiżdied kemm il-darba l-futbol Malti jirkeb tajjeb fuq dan l-ewwel suċċess ta’ din ix-xorta minn klabb Malti, u għaliex le, jibda jkolna aktar klabbs Maltin li jew ikunu qrib jew jirnexxilhom jilħqu l-istess tragward li kisbu dan l-istaġun Ħamrun Spartans.
Għadu kmieni biex forsi nibdew nifhmu b’mod tanġibbli l-vantaġġi kollha li l-futbol Malti għandu quddiemu f’dan il-mument minn din il-kwalifikazzjoni bla preċident ta’ Ħamrun Spartans. Iżda mingħajr ebda dubju, il-profil tal-futbol Malti, inkluż dak tat-tim nazzjonali Malti, għandu direzzjoni waħda biss fejn imur; ‘il fuq.
Kemm se jirnexxilna nieħdu minn dan is-suċċess ta’ tim wieħed, bħala futbol Malti inġenerali se jkun qed jiddependi mill-impenn u l-ħidma tal-klabbs tagħna. L-ewwel u qabel kollox fil-mod ta’ kif se jqassmu ż-żieda ta’ flus li se jkunu qed jibbenefikaw minha u x’tip ta’ investiment sostenibbli jagħżlu li jagħmlu.
Id-deċiżjoni ta’ kif se jintefqu l-flus hija determinanti f’dan l-istadju.L-għaqal fit-tmexxija u deċiżjonijiet meħuda b’moħħ u mhux b’qalb huma kruċjali.
//= $special ?>