Birkirkara ħabbru li t-Taljan Stefano De Angelis m’għadux aktar kowċ tagħhom, wara li l-kuntratt tiegħu “kien itterminat b’seħħ immedjat”, wara qbil bejn it-tnejn.
Wara li fl-ewwel sena tiegħu ma’ Birkirkara, De Angelis kellu staġun mill-aqwa fit-tmexxija teknika tal-Istripes tant li Birkirkara kienu logħba biss ‘il bogħod mir-rebħ tal-Malta Premier u l-FA Trophy, dan l-istaġun l-iskwadra ta’ De Angelis kellha bidu kwiet fil-Kampjonat b’żewġ partiti li ntemmu fi draw ta’ mingħajr gowls kontra Valletta u Gżira United.
Fl-Ewropa, l-esperjenza ta’ Birkirkara taħt it-tmexxija ta’ De Angelis kienet tajba iżda fl-istess waqt diżappuntanti ukoll. Huma lagħbu fl-ewwel rawnd ta’ kwalifikazzjoni tal-UEFA Conference League kontra FC Petrocub Hincesti tal-Moldova u impressjonaw mhux ftit fl-ewwwel partita li lagħbu kontra tagħhom, meta f’Malta kienu rebħu 1-0. Madankollu t-tieni leg kienet storja oħra, bit-tim Malti jitlef 3-0 f’Hîncești u b’hekk kien eliminat mal-ewwel mill-Ewropa.
Id-diversi bidliet li għamel it-tim, minkejja l-akkwisti interessanti li huma matul is-sajf, żgur m’għenux biex il-kowċ Taljan ikollu ħajja faċli fil-bidu tat-tieni sena tiegħu fit-tmexxija ta’ Birkirkara.
Madankollu wieħed kien qed ibassar li Birkirkara setgħu jieħdu deċiżjoni bħal din fil-bidu tal-Malta Premier, wara li t-tim ma skorja ebda gowl għalkemm ma soffra ebda gowl lanqas fl-ewwel żewġ partiti tal-Kampjonat..
Birkirkara irringrazzzjaw lil De Angelis għas-servizz li ta lill-klabb, inkluż post fiż-żewġ finali għar-rebħ tal-ogħla żewġ unuri fil-futbol Malti l-istaġun li għadda. Il-klabb awgura kull suċċess lil De Angelis għall-futur.
L-istqarrija maħruġa minn Birkirkara temmet billi qalet li “il-klabb jinsab fl-istadju finali sabiex iħabbar l-isem tal-kowċ il-ġdid, wara li tiġi ffinaliżata l-lista ta’ kandidati magħżula għal dan ir-rwol.”
