Matul il-jiem li għaddew, fi Pjazza Teatru Rjal ittellgħu żewġ kunċerti tajbin li kellhom attendenzi kbar. Qed nirreferi għat-tliet kunċerti li ta fostna l-kantant Taljan Pupo u l-kunċert ta’ William Mangion b’omaġġ għall-vuċi u l-artistrija ta’ Joe Cocker.
Tliet iljieli ta’ Notte Italiana twasslu bejn il-21 u t-23 ta’ Awwissu bis-suċċessi ta’ Enzo Ghinazzi, jew aħjar Pupo. Kienu tliet kunċerti li mlew it-teatru bl-ammirazzjoni kbira għal dan il-kantawtur mit-Toskana, bl-appuntament tiegħi jkun għall-aħħar kunċert tiegħu fostna. Ngħid il-verità ma stennejtx li t-tliet kunċerti jkunu kollha mibjugħa meta tqis li dan kien fostna fl-istess post sentejn ilu. Il-prezz għen ukoll.
F’sagħtejn u nofs, Pupo nissel tant memorji sbieħ b’tant kanzunetti li min jaf kemm indaqqu fil-programmi tal-mużika Taljana u f’dawk tal-għażla tas-semmiegħa lura għat-tieni nofs tas-snin sebgħin u s-snin tmenin meta Pupo kien fl-aqwa tiegħu. L-ammirazzjoni femminili tul il-kunċert kienet evidenti bil-kant ma’ kull vers. Pupo tana vjaġġ ta’ ħamsin sena ta’ suċċessi mill-karriera brillanti tiegħu li ħaditna lura għal era ta’ kanzunetti bħal ‘Ciao’, ‘Forse’, ‘Su di noi’ u ‘Cosa farai’ għal dawk l-aktar riċenti meħudha mill-album kurrenti ta’ din is-sena, Insieme. Ma naqsux ukoll kanzunetti oħra li kisbulu suċċess fosthom ‘Gelato al cioccolato’, ‘Firenze Santa Maria Novella’ li ħalliha għall-aħħar u ‘Un amore grande’ klassifikat fir-raba’ post f’Sanremo 1984.
Għalkemm il-vuċi tiegħu ma baqgħetx bħal ma kienet u l-età qed tagħmel tagħha, xorta Pupo ta kunċert mimli ħajja u enerġija b’tant anedotti bejn kanzunetta u oħra u t-tbissima ma naqsitx. Ma naqsitx it-tislima lill-Pippo Baudo li fakkar xi memorji tas-sehem tiegħu fil-Festival ta’ Sanremo. Pupo sellem ukoll l-artistrija ta’ kantanti ċelebri oħra Taljana fosthom Toto Cutugno, u s-sehem tiegħu fil-kanzunetta li huwa kien kiteb ghal Ricchi e Poveri, ‘Sara perche ti amo’ fl-1981.
L-artistrija ta’ Pupo kienet akkumpanjata mis-sehem tal-Malta Concert Orchestra taħt id-direzzjoni ta’ Mro Joe Brown, l-istess kif kienet sentejn ilu. Kien kunċert tajjeb kif jaf iwassal il-kantant ċkejken Taljan, kunċert mimli memorji u nostalġija f’lejla indimentikabbli Taljana.
Il-kantant William Mangion kien brillanti
William Mangion spettakolari
Kien kunċert mistenni li William Mangion Mascoli kien ilu snin joħlom bih. Il-kunċert fi Pjazza Teatru Rjal nhar is-27 ta’ Awwissu kien wieħed ċelebri mhux biss għar-ritorn ta’ Mangion fostna imqarr għal ftit jiem, iżda wkoll għall-omaġġ memorabbli li ta lil Joe Cocker. Tispikka l-vuċi tiegħu, vuċi bluesy, dinamika u b’saħħitha li tqaxxar il-grinta ta’ Cocker.
Kien kunċert twil bl-interpretazzjonijiet brillanti tal-aqwa tal-kanzunetti li tana Joe Cocker mill-1969 sal-aħħar tour li kien għamel fl-2014 qabel miet. Kanzunetta waħda wara l-oħra li ħarġet l-emozzjoni vokali u l-grinta ta’ Mangion akkumpanjat minn sitt mużiċisti bravi fil-band internazzjonali tiegħu bl-isem ta’ Fire It Up, u żewġ backing vocals, f’ħoss kompatt u artistrija mużikali speċjalment b’solos tajba.
Il-kunċert ta’ vjaġġ twil fil-karriera ta’ Joe Cocker, ħafna minhom suċċessi kbar kien evidenti fl-interpretazzjonijiet ta’ ‘The Letter’, ‘When the Night Comes’, ‘Tear Us Apart’, ‘I’ll be your Doctor’, il-famuża ‘Up Where We Belong’ mill-film tal-1982 ‘An Officer and a Gentleman’, ‘She came in Through The Bathroom Window’, ‘Fire It Up’ u ‘Delta Lady’ fost siltiet oħra mir-ripertorju vast ta’ Cocker.
Subblimi kienet it-tislima lil David Vella, accordionist li ħalliena ftit tax-xhur ilu, tislima xierqa tul il-kunċert lil dan il-ħabib u mużiċist li kemm-il darba daqq ta’ Mangion u kellu jkun ukoll parti minn dan il-kunċert iżda d-destin ried mod ieħor. Il-memorja tiegħu twaslet fis-silta ‘N`oubliez jamais’.
Ma naqsux kanzunetti oħra klassiċi fosthom ‘Summer in the City’, ‘First We Take Manhattan’, ‘You Can Leave Your Hat On’, ‘Unchain My Heart’, ‘With a Little Help From My Friends’ u ‘You Are So Beautiful’ b’dedika għall-maħbuba tiegħu – kanzunetti kollha kbar b’tant suċċess għal Joe Cocker. William Mangion joħroġ iċ-ċelebrità u d-dinamiżmu fl-interpretazzjoni tagħhom b’vuċi li għadha ssaħħrek.
Kien kunċert tajjeb, omaġġ mill-aqwa lil dan l-artist li kien fostna f’Awwissu tal-1991 meta wkoll William Mangion u Getting Closer kien supporting act fil-kunċert li kien ta f’Malta. Il-memorji ma naqsux. Prosit William! Qabel William Mangion u Fire It Up, daqq il-band lokali The Blacktones.
