Żewġ irġiel tressqu l-Qorti fuq serq ta’ żewġ laned ħut minn mini market f’Gżira – wieħed ammetta u ngħata sentenza sospiża, l-ieħor ingħata l-ħelsien mill-arrest. Iċ-ċittadini Tuneżini, wieħed residenti l-Belt Valletta u l-ieħor bla indirizz fiss, spiċċaw mixlija fil-Qorti wara li allegatament serqu landa tonn taż-żejt u oħra sardin minn mini market fil-Gżira, għall-ħabta tas-12:30 am tal-Ħamis 28 ta’ Awwissu.
L-Ispettur Elton Buckingham, li mexxa l-prosekuzzjoni, spjega kif Abdell Raouf Mohfoudi Ali Hassan, ta’ 43 sena, daħal fil-ħanut u warajh daħal Rami Abidi, ta’ 42 sena. Filmati tas-CCTV juru lil Abidi jimxi b’mod instabbli, u l-Pulizija ssuspettaw li seta’ kien xurban.
Skont ix-xhieda, it-tnejn marru fil-parti ta’ wara tal-ħanut, fejn waqgħu xi oġġetti mill-ixkafef. Dan qajjem suspetti għall-ħaddiem tal-ħanut, li resaq eqreb. Filwaqt li Ali Hassan deher qiegħed jerġa’ jiġbor l-oġġetti mill-art, Abidi allegatament poġġa żewġ laned fil-but. Meta ġie mitlub biex joħroġhom, iż-żewġ irġiel telqu minnufih, u ġiet imsejħa l-Pulizija.
Nofsiegħa wara, il-Pulizija sabithom fi ġnien pubbliku fil-Gżira u arrestathom. L-oġġetti misruqa kellhom valur ta’ €6.20. Abidi wieġeb ħati, u stqarr li kien xurban meta seħħ l-inċident u wera ndiema. L-avukat tad-difiża Noel Bianco irrimarka li l-klijent tiegħu għandu kondotta kriminali nadifa u kellu l-intenzjoni jħallas lura l-ammont.
Il-Maġistrat Leonard Caruana kkundanna lil Abidi għal tliet xhur ħabs, iżda sospiża s-sentenza għal sena. Min-naħa l-oħra, Ali Hassan wieġeb mhux ħati, u permezz tal-avukat tiegħu Noel Bianco, talab għall-ħelsien mill-arrest, billi l-filmat ma juri l-ebda serq min-naħa tiegħu, u jidher li kien fil-post żbaljat fiż-żmien żbaljat.
L-avukat żied jgħid li l-akkużat għandu indirizz fiss, impjieg u ikkopera mal-Pulizija matul l-investigazzjoni. Il-Qorti laqgħet it-talba għall-pleġġ u ordnat li Ali Hassan jingħata ħelsien mill-arrest fuq depożitu ta’ €200 u garanzija personali ta’ €3,000. Ġie ordnat jiffirma l-Għassa tal-Pulizija tliet darbiet fil-ġimgħa u ġiet imposta fuqu curfew.
Il-każ instema’ quddiem il-Maġistrat Leonard Caruana. Il-prosekuzzjoni kienet immexxija mill-Ispettur Elton Buckingham, filwaqt li l-avukat Noel Bianco deher għall-akkużati.
