F’konferenza li saret is-Sibt filgħodu fl-uffiċini tar-Reġjun Tramuntana, li ġiet indirizzata mis-Sindki ta-Partit Nazzjonalista Censu Galea u Angelo Micallef, sar appell dwar il-kriżi tal-iskart li għaddej minnu pajjiżna… hekk kif minn Jannar tal-2023, il-ġbir tal-iskart ma baqax f’idejn il-Kunsilli, iżda waqa’ taħt ir-responsabbilita’ tal-Gvern ċentrali.
Huma semmew kif din il-problema qed taffettwa ċertu lokalitajiet iżjed minn oħrajn, partikolarment lokalitajiet kbar li għadhom ammont sostanzjali ta’ barranin. Huma semmew ukoll kif mhux ġust li l-Kunsill qed jiġu akkużati li qed jonqsu mid-dmirijiet tagħhom meta l-każ hu li anqas biss għandhom kontroll fuq l-iskart.
Dwar dan, huma sostnew li l-Kunsilli għandhom ikollhom setgħa fuq sistema ta’ dixxiplina lokali, u jkollhom kontroll effettiv fuq il-kuntratturi responsabbli.
Semmew ukoll kif minkejja li l-’bring-in sites’ huma idea tajba, il-liġi ma tidħolx f’biżżejjed dettall dwar min għandu jkun verament responsabbli għalihom, u qed jintefa piż inġust fuq il-Kunsilli. U b’hekk huma jridu li jkun hemm emenda fil-liġi, li l-operatur ikun dak li verament jieħu ħsieb dawn is-siti, filwaqt li l-Kunsilli jkollhom sorveljanza fuq dawn is-siti, sabiex jaraw li s-servizz isir fl-aħjar interess tar-residenti.
Sabiex jibdew jindirizzaw din il-problema, il-Kunsill tat-Tramuntana flimkien mar-Reġjun qasmu informazzjoni dwar il-ġbir tal-iskart bieb bieb b’numru ta’ lingwi differenti sabiex ir-residenti kollha jkunu jistgħu verament jifhmu kif l-iskart jinġabar.
Dan qed isir minħabba li b’mod frekwenti qed tinħareġ il-borża f’ġranet ħżiena.
Huma għamlu wkoll għadd ta’ proposti, fosthom li hemm bżonn ikun hemm aktar trakkijiet biex tinġabar il-borża s-sewda, u li l-borża l-griża għandha tinġabar darbtejn fil-ġimgħa u mhux darba biss.
