Gvern ġdid Nazzjonalista jassigura sistemi preventivi b’saħħithom
Fid-dawl tal-konklużjoni tal-inkjesta dwar il-mewt ta’ Mirabelle Falzon, għal darba oħra, bħal fil-każ tal-imwiet ta’ Jean Paul Sofia, Bernice Cassar u Miriam Pace, joħroġ ċar il-bżonn ta’ bidla vera fil-mod kif pajjiżna qed jitmexxa: bidla minn fuq s’isfel. Il-Partit Nazzjonalista jemmen bis-saħħa li f’Malta hawn bżonn ta’ gvern li jaħseb kif jista’ jevita t-traġedji, u mhux Gvern li jkun reattiv biss wara t-telfa ta’ xi ħadd.
Il-Partit Nazzjonalista jagħti mill-ġdid il-kondoljanzi lill-familji ta’ dawn il-vittmi wara t-telfa traġika li sofrew.
Għalkemm l-ebda deċiżjoni jew azzjoni wara din l-inkjesta mhi se ġġib lura l-ħajja ta’ Mirabelle, it-tfajla mimlija ħajja ta’ 22 sena, il-Partit Nazzjonalista jinsisti li hemm bżonn immedjat li tinġarr responsabbiltà politika mill-Gvern kif ukoll li bis-serjetà jidħlu fis-seħħ – u fuq kollox jitħaddmu fil-prattika, dawk il-bidliet – dwar rapporti ta’ strutturi perikolużi. Kull ilment, kull rapport, jista’ jfisser ħajja mitlufa u familja mkissra.
F’kull wieħed minn dawn il-każijiet is-sinjali kienu evidenti u saru rapporti li l-Gvern Laburista sempliċiment injora jew ħa biċċa azzjoni u tard wisq. Il-kultura instigatata mill-Gvern li kull entità pubblika hija meqjusa bħala “repubblika” ghaliha qed trażżanhom milli jaħdmu flimkien u qed timmina b’mod perikoluż il-protezzjoni taċ-ċittadini. Il-konsegwenza fatali ta’ dan il-falliment istuzzjonalizzat huwa t-telf ta’ ħajjiet ta’ persuni, nisa u żgħażagħ, li ntilfu tort ta’ nuqqasijiet istituzzjonali u burokratiċi li setgħu jiġu evitati.
Din l-istess attitudni narawha wkoll fil-qasam tal-wirt nazzjonali. Il-fortifikazzjonijiet, ċertu monumenti u bini storiku ieħor tagħna għandhom jiġu mħarsa aħjar anke minħabba l-bidla fil-klima u apparti dan il-fenomenu naturali anke minħabba l-fatt li nistgħu nitilfuhom darba għal dejjem. Kif ukoll għandhom ikomplu jiġu miżmumin tajjeb biex ma jkunux ta’ periklu għall-ħajja taċ-ċittadin.
Gvern ġdid Nazzjonalista joħloq qafas preventiv ċar u komprensiv ta’ saħħa u sigurtà pubblika li l-pajjiż tant għandu bżonn. Dan il-qafas modern għandu jintegra mingħajr burokrazija s-sigurtà fuq il-post tax-xogħol, il-bini u l-istrutturi, infrastruttura pubblika bħal toroq u bankini, il-protezzjoni minn riskji ambjentali u l-preservazzjoni tal-wirt storiku. Sistema waħda, sħiħa, magħquda u koerenti li tħares il-ħajja u s-saħħa taċ-ċittadini u li taħdem fuq prevenzjoni qabel ma tiġri d-diżgrazzja.
Il-PN jemmen li l-protezzjoni tal-ħajja, is-saħħa u l-wirt storiku għandhom ikunu prijorità. Pajjiżna jixraqlu tmexxija serja li taħdem fuq il-prevenzjoni u l-protezzjoni: gvern li jipprevjeni t-traġedji, mhux jirreaġixxi meta jkun tard wisq.
Dan intqal fi stqarrija mix-Shadow Minister għall-Ippjanar u l-Artijiet Stanley Zammit, mix-Shadow Minister għall-Wirt Nazzjonali, l-Arti u l-Kultura Julie Zahra u mix-Shadow Minister għall-Intern, is-Sigurtà u r-Riformi Darren Carabott.
