Fi stqarrija il-General Workers Union saħqet li wara l-aħbar tal-bieraħ dwar l-għeluq tal-impjant ta’ Carlo Gavazzi f’Bulebel, l-istess GWU immobilizzat pjan ta’ azzjoni immedjat biex tagħti l-appoġġ kollu lill-impjegati milquta.
Il-union qalet li diġà bdiet diskussjonijiet ma’ diversi entitajiet sabiex jinsabu ipjiegi ġodda.
“L-interess immedjat minn kumpaniji oħra huwa xhieda ċara li l-ħaddiema ta’ Carlo Gavazzi għandhom ħiliet apprezzati u mfittxija ħafna fis-suq tax-xogħol Malti,” qal is-Segretarju Ġenerali tal-GWU, Josef Bugeja.
Min naħa l-oħra, David Darmanin, Segretarju tat-Taqsima Teknoloġija, Elettronika u Komunikazzjoni, żied jgħid li “Immedjatament wara l-laqgħa mal-kumpanija, il-prijorità tagħna kienet li niltaqgħu mar-rappreżentanti tal-ħaddiema”
Intant il-GWU saħqet li min naħa tagħha se tkompli tpoġġi lill-ħaddiema fil-qalba tal-proċess, filwaqt li taħdem biex tlaqqagħhom ma’ impjiegi ġodda.
