Il-Qorti Federali tal-Appell fl-Istati Uniti ddeċidiet li l-biċċa l-kbira tat-tariffi kummerċjali imposti mill-President Amerikan Donald Trump huma kontra l-liġi.
B’maġġoranza ta’ 7 kontra 4, il-Qorti ċaħdet l-argumenti ta’ Trump li dawn it-tariffi kienu ġustifikati taħt il-liġi magħrufa bħala l-International Emergency Economic Powers Act, u sejħithom “invalidi, u kontra l-liġi”.
Il-Qorti saħqet li l-użu ta’ dan l-att bħala bażi legali għal tariffi fuq prodotti importati minn diversi pajjiżi – inkluż iċ-Ċina, il-Kanada u l-Messiku – imur kontra l-liġi federali. Iżda minkejja din id-deċiżjoni, it-tariffi se jibqgħu fis-seħħ temporanjament sal-14 ta’ Ottubru, sabiex tingħata opportunità lill-Gvern Amerikan jappella l-każ quddiem il-Qorti Suprema.
Id-deċiżjoni mistennija jkollha impatt sinifikanti fuq il-politika kummerċjali tal-Istati Uniti, speċjalment fuq dazji futuri u t-tmexxija presidenzjali f’sitwazzjonijiet ekonomiċi ta’ emerġenza.
Dan il-każ ġie mressaq minn diversi kumpaniji u importaturi li argumentaw li l-amministrazzjoni ta’ Trump kellha tkun suġġetta għal skrutinju aktar strett mill-Kungress qabel timponi tariffi fuq skala daqshekk wiesgħa.
