Is-Sibt kien it-tieni jum tal-votazzjoni bikrija fl-Elezzjoni għal Kap il-ġdid tal-PN – early voting li ġie fi tmiemu kemm f’Malta u kif ukoll f’Għawdex.
Il-votazzjoni kompliet kemm fid-Dar Centrali tal-PN u anke fis-Sub Headquarters f’Ta’ Sannat.
L-early voting fetaħ propju fid-9am. Liema proċess mexa kif kien pjanat.
Fost dawk li vvutaw kien hemm l-eks Kap tal-PN Simon Busuttil.
Kif jipprovdi l-Istatut tal-Partit Nazzjonalista, il-Kummissjoni Elettorali organizzat il-votazzjonijiet bikrija ta’ din il-ġimgħa għal dawk il-membri tesserato li għal xi raġuni ma setgħux jivvutaw fil-jum proprju tal-votazzjoni.
Madanakollu, kull tesserat eliġibbli biex jivvota seta’ jagħżel hu l-ġurnata u l-post tal-votazzjoni fejn jixtieq jitfa’ l-vot tiegħu, sew f’Malta kif ukoll f’Għawdex. Sabiex issa kollox jinsab lest għal jum il-Konvenzjoni tat-tesserat fis-6 ta’ Settembru; il-ġurnata li ser ittemm dan il-proċess li se jwassal biex il-PN jeleġġi Kap ġdid minn fost it-tesserati.
Fis-6 ta’ Settembru, fil-jum propju tal-elezzjoni għal Kap tal-PN, ser ikun hemm varjetà ta’ postijiet ta’ votazzjoni – fid-Dar Ċentrali f’Tal-Pieta, il-Każini tal-PN tal-Imġarr, Ħal Safi u Ħal Tarxien. Apparti li ser tkun qed tkompli wkoll il-votazzjoni f’Ta Sannat f’Għawdex.
Il-postijiet ta’ votazzjoni l-ġimgħa d-dieħla jiftħu fid-9am kemm f’Malta kif ukoll f’Għawdex, filwaqt li f’Ta Sannat il-vot jalaq fil-5pm …. f’Malta jibqa’ għaddej sas-7pm.
Wara l-għeluq tal-votazzjoni, Net TV u Net FM se jkunu qed iħabbru r-riżultat waqt xandira specjali li se titwassal dakinhar.
Din l-elezzjoni qed tkun ikkontestata minn Alex Borg u Adrian Delia li tefgħu n-nominazzjoni tagħhom wara li għaddew mill-proċess ta’ verifika mmexxi mill-Kummissjoni Kandidati tal-Partit Nazzjonalista.
