L-aħħar sessjoni tal-Konvenzjoni Ġenerali tal-PN issa titlaqqa’ s-Sibt li ġej, 6 ta’ Settembru bl-aħħar jum ta’ votazzjoni f’Malta u Għawdex
Fl-ewwel jumejn ta’ votazzjoni bikrija fl-elezzjoni għal Kap tal-Partit Nazzjonalista nhar l-Erbgħa u llum, ivvutaw b’kollox 40% tat-tesserati eliġibbli biex jivvutaw f’din l-elezzjoni.
Illum is-Sibt 30 ta’ Awwissu, ivvutaw 25% tat-tesserati wara li nhar l-Erbgħa li għadda 27 ta’ Awwissu kienu diġà marru jitfgħu l-vot tagħhom 15% tat-tesserati eliġibbli.
It-total ta’ votanti eliġibbli jammonta b’kollox għal madwar 20,600.
Illum, it-tesserati bid-dritt tal-vot setgħu jitfgħu l-vot tagħhom bejn id-9am u s-7pm fid-Dar Ċentrali tal-Partit Nazzjonalista f’Malta, u bejn id-9am u l-5pm fis-Sub Hdqs tal-Partit Nazzjonalista f’Ta’ Sannat, Għawdex.
Il-Kummissjoni Elettorali, Rekords u Data tal-PN tfakkar li l-votazzjoni tagħlaq nhar is-Sibt li ġej 6 ta’ Settembru, bl-aħħar sessjoni tal-Konvenzjoni Ġenerali li matulha jkun elett il-Kap il-ġdid tal-PN, kariga li għaliha qed jikkontestaw il-kandidati Alex Borg u Adrian Delia.
Nhar is-Sibt li ġej, il-jum proprju tal-votazzjoni, se jkun hemm votazzjoni mifruxa f’numru ta’ postijiet madwar Malta u Għawdex:
Is-Sibt 6 ta’ Settembru 2025
Jum l-elezzjoni
Malta: Dar Ċentrali PN u Każini PN Safi, Tarxien u Mġarr bejn id-9am u s-7pm
Għawdex: Sub-Headquarters tal-PN f’Ta’ Sannat bejn id-9am u l-5pm
Il-Kummissjoni Elettorali tfakkar li dawk eliġibbli biex jivvutaw f’din l-elezzjoni huma l-membri tal-PN li aġġornaw it-tessera tagħhom skont kif stabbilit fl-Istatut u fir-Regolamenti sa għaxart ijiem qabel jum l-elezzjoni, jiġifieri sa nhar l-Erbgħa 27 ta’ Awwissu f’nofsinhar.
Kull min għandu d-dritt tal-vot irid jieħu miegħu l-karta tal-identità maċ-Ċertifikat tal-Vot li ntbagħat fid-djar bil-posta. Dawk li aġġornaw it-tessera tagħhom sa meta għalaq il-perjodu tat-tiġdid tat-tesserament u għal xi raġuni ma rċivewx iċ-Ċertifikat tal-Vot, se jkunu jistgħu jiġbru ċ-Ċertifikat tal-Vot nhar is-Sibt stess mill-post tal-votazzjoni, qabel jivvutaw.
