Mill-inkjesta maġisterjali b’rabta mal-mewta taġika ta’ Mirabelle Falzon ħareġ ċar illi dan il-każ kien riżultat tal-burokrazija fi ħdan l-entitajiet tal-Gvern.
Mirabelle Falzon mietet fid-19 ta’ Lulju tal-2024 meta intlaqtet minn ġebel li waqat fiz-zona tal-Munxar, fil-limiti tal-Bajja ta’ San Tumas. Dan il-ġebel waqa’ mill-fdalijiet ta’ batterija militari tas-seklu 18, magħrufa bħala ta’ Riħama.
F’konferenza li saret is-Sibt f’din l-istess zona, l-avukat tal-familja ta’ Mirabelle Conrad Borg Manche spjega ma’ Net News illi dan il-mewt kien kollu tort it-traskuragni tal-Gvern, hekk kif appellaw dwar il-periklu li hemm f’din iz-zona.
F’din il-konferenza kien hemm ukoll il-genituri ta’ Mirabelle, kif ukoll l-attivista Conrad Neil Gatt, li kien għamel appell dwar il-periklu ftit jiem biss qabel ma seħħ dan l-inċident traġiku.
Huma spjegaw kif fl-inkjesta, il-Maġistrat Antoine Agius Bonnici sostna illi minkejja r-rapporti li għamlu l-Kunsill Lokali, l-NGOs u ċ-ċittadini privati, dawn ir-rapporti ntilfu fil-burokrazija tal-entitajiet tal-Gvern. U huwa għalhekk li r-Riħama tħalliet tispiċċa fl-istat li tinsab fih issa.
Sostnew ukoll li l-Maġistrat sab li għalkemm kien hemm diversi tentattivi matul is-snin biex il-bini jiġi restawrat, dan qatt ma seħħ minħabba nuqqas ta’ fondi u riżorsi.
L-avukat Borg Manche temm billi semma r-rakomandazzjonijiet finali li għamel il-Maġistrat b’dak kollox li sab waqt li ħejja l-inkjesta, fejn qal li l-Maġistrat irrakkomanda li għandha tinħoloq entità waħda li tkun responsabbli biex tirċievi rapporti dwar bini tal-istat u privat, kif ukoll bini u strutturi abbandunati bħal swar u rdumijiet li jippreżentaw periklu għall-pubbliku.
