Fabbrika oħra ser tkun qed ixxolji min-negozju f’Malta. B’Net News jista’ jikkonferma li sfortunatament madwar 30 persuna mistennija titlef xogħlha.
Dan wara li ġie kkonfermat ma’ din il-Kamra tal-aħbarjiet, li l-Kumanijja Mediterranean Power Electric ser tkun qed talaq il-bibieb tagħha. B’iktar minn 30 persuna mistennija titlef xogħlha – U sorsi li qalulna kif dawn il-ħaddiema ilhom fuq xahar u nofs bin-notice.
Intant il-Kumpanija Mediterranean Power Electric, skont sorsi li tkellmu ma’ din il-Kamra tal-aħbarjiet, saħqu li matul dawn l-aħħar snin il-bejgħ u l-investiment fi ħdan il-kumpanijja li topera f’pajjiżna naqas sew u, l-istess sorsi qalulna, li l-Gvern naqas milli jgħin u jinvesti bis-saħħa fis-settur tal-manifattura – b’riżultat li issa din il-fabbrika waslet sabiex talaq il-bibien.
Din hija kumpanija tal-manifattura u ilha topera f’pajjiżna mill-1977, fejn serviet bħala pilastru tan-niċċa ekonomika tal-manifattura f’pajjiżna – bil-maġġoranza tax-xogħol jiġi esportat fl-Afrika ta’ fuq kif ukoll f’numru ta’ pajjiżi fil-Mediterran.
Iżda wara 47 sena ta’ operat f’pajjiżna – din il-kumpanijja ser tkun qed ixxolji minn pajjiżna wkoll – b’ħaddiema tas-sengħa, fi ħdana, li ser jispiċċaw jitilfu l-impjieg tagħhom.
Din l-aħbar tasal ukoll wara li l-kumpanija Carlo Gavazzi kkonfermat li se twaqqaf l-operazzjonijiet tagħha f’Malta sabiex tikkonsolida l-operazzjonijiet tagħha lil hinn minn pajjiżna. U mal-140 ħaddiem , b’riżultat ta’ dan ser jispiċċaw bla xogħol.
Intant din il-kriżi fi ħdan is-settur ekonomiku tal-manifattura f’pajjiżna – liema settur f’dawn l-aħħar snin safa’ abbandunat mill-Gvern Laburista, ser ikompli jieħu daqqa ‘l isfel.
B’riżultat li f’dawn il-jumejn ġie kkonfermat li kważi 170 ħaddiem, minn żewġ kumpanijji differenti, issa sfaw fil-limbu, bil-futur tagħhom u tal-familja jinsab imċajpar għall-aħħar.
