Għada tiġi fit-tmiemha match day 2 bil-konfront bejn ir-rivali, Ħamrun Spartans kontra Valletta, fis-7:30pm fl-Istadium Nazzjonali f’Ta’Qali
Wara nuqqas ta’ kważi sena u nofs mil-Malta Premier, għada l-Ħadd se jkun qed jintlagħab mill-ġdid il-konfront bejn tnejn mill-akbar rivali ta’ kull żmien, Ħamrun Spartans u Valletta. F’ġimgħa unika u mimlihja emozzjonijiet sbieħ għal Ħamrun Spartans, wara li nhar il-Ħamis li għadda kitbu l-istorja kontra RFS tal-Latvja b’kwalifikazzjoni għall-fażi tal-Kampjonat tal-UEFA Conference League, il-moral tal-Ħamruniżi hu wieħed għoli iżda tinħass ukoll l-element ta’ għajja.
F’kummenti waqt konferenza stampa li saret dalgħodu fl-Istadium Nazzjonali f’Ta’Qali, il-kowċ Taljan ta’ Ħamrun Spartans, Giacomo Modica qal li kien ikun idejali li kieku setgħu jistrieħu ftit aktar qabel dan il-konfront dirett kontra Valletta, imma “ninsabu lesti biex naffaċċjaw lill-Beltin,” qal Modica. Madankollu l-Isqalli kien sinċier biżżejjed li qal li kien jippreferi li konfront bħal dan, sforz ir-rivalitá li teżisti bejn it-tnejn, kien se jintlagħab aktar ‘il quddiem fl-iskeda ta’ partiti tal-Malta Premier.
Thane Micallef, kowċ ta’ Valletta, saħaq li ma kienx kuntent li bejn l-ewwel u t-tieni logħba tal-Kampjonat kien hemm waqfa daqsant twila pero jifhem iċ-ċirkostanzi.
Micallef saħaq li kwalunkwé motivazzjoni u ewforija mentali li jista’ jkollhom Ħamrun Spartans fil-ġurnata, wara s-suċċess li kisbu fl-Ewropa, hu sekondarju għal Valletta. “L-importanti li aħna nilgħabu l-logħba tagħna skont kif konna qed naħdmu u nippreparaw f’dawn il-jiem ta’ waqfa,” qal Micallef f’kummenti lil Net Sports.
Iż-żewġ timijiet bdew il-Malta Premier 2025/26 b’żewġ draws. Valletta temmew fi draw ta’ mingħajr gowls kontra Birkirkara filwaqt li Ħamrun Spartans iddiżapuntaw fl-ewwel ħarġa, meta Tarxien Rainbows issorprendewhom meta żammewhom fi draw ta’ 1-1.
L-aħħar darba li Ħamrun Spartans u Valletta lagħbu kontra xulxin kien nhar it-2 ta’ Marzu 2024 fil-Kampjonat. Dak in-nhar, id-dwell bejn it-tnejn kien spiċċa fi draw ta’ 1-1, b’Ħamrun Spartans kienu fetħu l-iskor l-ewwel permezz tal-eks plejer tagħhom Uros Duranovic, eżatt qabel il-mistrieħ, iżda tnax-il minuta mil-bidu tat-tieni taqsima, Brandon Paiber għal Valletta kien skorja l-gowl tad-draw.
Ħamrun Spartans kontra Valletta se tkun qed tagħlaq match day 2 tal-Malta Premier u l-partita se tkun qed tintlagħab għada l-Ħadd, fis-7:30pm fl-Istadium Nazzjonali f’Ta’Qali.
