Prim Ministru insensittiv – Prim Ministru li quddiem l-eżitu ta’ inkjesta maġisterjali interna oħra li sabet il-Gvern ħati ta’ negliġenza….il-Ħadd filgħodu għażel li jinjoraha għal kollox.
Dan hekk kif tul il-jum tas-Sibt kien imħabbar li ġiet konkluża l-inkjesta Maġisterjali b’rabta mal-mewt ta’ Mirabelle Falzon – inkjesta mmexxija mill-Maġistrat Antoine Agius Bonnici li kkonkludiet li minkejja l-fatt li saru għadd ta’ rapporti mill-Kunsilli lokali, NGOs u ċittadini privati …. dawn ir-rapporti intilfu fil-burokrazija u l-awtoritajiet tal-Gvern – bil-konsegwenza li Mirabelle Falzon, tfajla ta’ 22 sena tilfet ħajjitha waqt li kienet qed tgħum.
L-inkjesta kkonludiet fi kliem sempliċi li b’negliġenza tal-Gvern – ma sarx ix-xogħol meħtieġ fuq il-batterija ta’ Riħama …minkejja l-appelli informali u formali…u eventwalment waqa’ l-ġebel li sfortunatament wassal għal mewt ta’ Mirabelle Falzon.
Minkejja din il-konklużjoni iebsa, Robert Abela ma lissen ebda kelma dwar dan kollu minkejja li mess diversi suġġetti oħrajn.
Minflok indirizza l-kwistjoni, għażel li jinjoraha għal kollox u jixħitha taħt it-tapit daqslikieku qatt ma kienet.
Robert Abela għażel li jippompja Gvern immexxi mil-Labour li jinsab maħtuf u fi kriżi – u prontament erħilha toħroġ il-wegħda tat-trasport tal-massa – wegħda li l-Gvern Laburista issa qed jiddiletta biha meta jkun dahru mal-ħajt.
Għaliex wara li nefaq tal-inqas €400,000 f’tined fi Pjazza Tritoni u ilu għal dawn l-aħħar 3 snin …u wara li l-Ministru tat-Trasport qalilna ċar u tond li ma tistax issir u dinhija biss fissazzjoni…
Issa Robert Abela reġa’ qal li l-proġett ma tarx mar-riħ u xeħitha fuq il-Partit Nazzjonalista.
Minkejja li Bonett innifsu qalilna li hija ekonomikament mhux vijabbli.
Intant, b’rabta mal-proposti li tressqu l-quddiem fejn tidħol sigurtà fit-toroq, il-Prim Ministru kellu jammetti li fil-prinċipju jaqblu ma’ dawk imressqa mill-Partit Nazzjonalista ftit tal-jiem qabel. Dan filwaqt li ċaħad li hu qed imexxi Gvern reattiv.
Dan hekk kif bosta staqsew għalfejn kellhom imutu 19-il persuna fl-ewwel 8 xhur tas-sena minkejja l-appelli ta’ bosta – biex forsi l-Gvern ta’ Abela jibda jiċċaqlaq f’dan ir-rigward.
Finalment, Robert Abela tkellem dwar ir-riforma tal-Ippjanar bl-abbozzi 143 u 144 li issa ninsabu ġimgħa ‘l bogħod mill-għeluq tal-konsultazzjoni pubblika.
Il-Prim Ministru spjega li r-riforma li jrid hi biex mhux biss jibbenefika minnha s-sinjur biss – iżda xorta waħda biex persuna tiġi in regola, tiflaħ jew ma tiflaħx tħallas…..m’għandekx għażla oħra ħlief li tħallas.
Dan filwaqt li fejn jidħlu twieqi, bibien, aperturi oħra…jew saħansitra bċejjeċ oħrajn bħal pools mibnija bla permess …. kellu jammetti li l-Gvern tiegħu għaffiġha bil-kbir.
