It-Tnejn filgħaxija, Net TV u Net FM se jkunu qed iwasslu l-aħħar dibattitu f’din il-kampanja bejn Alex Borg u Adrian Delia. Dan wara li ż-żewġ kandidati kienu diġa’ ipparteċipaw f’dibattitu aktar kmieni dan ix-xahar, li kien immexxi minn Dione Borg.
Dakinhar, kienu 90,000 il-persuni li segwew dak id-dibattitu – xhieda ċara tal-interess li qed iqajjem dan il-proċess, u l-entużjażmu kbir li hemm għall-ħatra ta’ Kap ġdid tal-PN.
Eluf kienu segwew id-dibattitu fuq il-media soċjali. U anke ix-xandira tat-Tnejn, se tieħu dan il-format – bid-dibattitu ikun qed jitwassal fuq Facebook live.
Ix-xandira se tibda fit-8:30pm, u se tkun qed issir wara l-ewwel jumejn ta’ votazzjoni bikrija fl-elezzjoni għal Kap tal-Partit Nazzjonalista fejn ivvutaw b’kollox 40% tat-tesserati eliġibbli.
Is-Sibt biss, ivvutaw 25% tat-tesserati wara li nhar l-Erbgħa li għadda kienu diġà marru jitfgħu l-vot tagħhom 15% tat-tesserati eliġibbli.
It-total ta’ votanti eliġibbli jammonta b’kollox għal madwar 20,600.
Il-votazzjoni tas-sibt li ġej se tkun mifruxa fid-Dar Ċentrali PN u fil-każini PN Safi, Tarxien u Mġarr. Il-postijiet tal-votazzjoni se jkunu miftuħa bejn id-9am u s-7pm. Dan filwaqt li fis-Sub-Headquarters tal-PN f’Ta’ Sannat, it-tesserati jistgħu jivvutaw bejn id-9am u l-5pm.
Dakinhar, Net TV u Net FM se jwasslu programm speċjali mill-ħin tal-għeluq tal-votazzjoni ‘il quddiem, li se jinkludi fih il-proċess tal-għadd tal-voti u t-tħabbira tar-riżultat uffiċjali.
