Rittmar Hartherly ta’ 38 sena mill-Belt, baqa’ taħt arrest wara li ammetta li pprova jisraq minn uffiċċju legali fil-Belt Valletta fil-lejl tat-30 ta’ Awwissu.
L-alarm tal-uffiċċju daqq għall-ħabta tat-tlieta ta’ filgħodu u mis-sistema tas-siġurtà l-akkużat deher fil-binja, fejn minnhemmek il-pulizija marru fuq il-post u arrestawh.
L-akkużat kien mixli wkoll li kiser il-kundizzjonijiet tal-ħelsien mill-arrest f’żewġ okkażjonijiet oħra u li naqas milli jħares s-sentenzi tal-Qorti.
Quddiem il-Maġistrat Kevan Azzopardi, huwa ammetta l-akkużi u sostna li ma jaħdimx.
Il-Qorti semgħet ukoll li fl-2007 kien għamel programm ta’ rijabilitazzjoni u issa xtaq jerġa’ jagħmel trattament simili.
Il-Maġistrat wissieh biex jindirizza l-vizzju tad-droga li qed jeqred ħajtu.
Id-difiża ma talbitx għall-ħelsien mill-arrest u għalhekk il-Qorti ordnat li jibqa’ miżmum sakemm tingħata s-sentenza.
