L-eliminazzjoni ta’ RFS mill-UEFA Conference League kienet daqs li kieku traġedja għall-klabb mill-Latvja. Diversi rapporti fil-media tal-pajjiż jikkomfermaw dawn filwaqt li sorsi li kienu preżenti minn Malta għall-partita ta’ nhar il-Ħamis li għadda, ikkonfermaw ma’ Replay r-rabja u l-frustazzjoni li kellu l-President tal-klabb, Artjoms Milovs kemm qabel kif ukoll it-tieni partita f’Riga.
Jidher ċar li l-akbar żball tal-avversarji ta’ Ħamrun Spartans kien l-atteġjament tagħhom lejn is-saħħa tat-tim Malti u l-fatt li sa minn qabel iż-żewġ partiti u anke wara l-ewwel partita li tilfu f’Malta, il-mod ta’ kif kienu qed jitkelmu anke mhux quddiem il-media, kien li huma kellhom jgħaddu bla diffikulta għall-fażi tal-Kampjonat tal-UEFA Conference League.
Wara l-ewwel partita, li tilfu f’Malta 1-0 kontra Ħamrun Spartans, RFS bdew iweħlu fil-kundizzjoni tal-Istadium f’Ta’Qali; argument li fil-veritá ma jreġġix għaliex jekk l-art kienet ħażina għal tim, allura anke t-tim l-ieħor lagħab fl-istess kundizzjonijiet. Dan ifisser li ma tistax tweħħel fuq il-wiċċ tal-pitch għax tlift logħba għaliex hi ħaġa ovja li dawk it-tip ta’ ċirkostanzi ma jaġevolawx tim minn ieħor.
F’Riga, qabel it-tieni partita, RFS komplew isemmu l-wiċċ tal-ground bħala skuża, u qishom għal mument jinsew li ma kienux qed jilgħabu waħedhom. Sa minn qabel din il-partita, diversi individwi li tkelmu magħna qalulna li t-tmexxija tal-klabb pruvat turi element ta’ superjoritá fuq il-Ħamruniżi u billi b’mod diplomatiku javvżawhom sa minn qabel id-90 minuta f’Riga, li t-tieni leg kienet se tkun storja oħra. Saħansitra f’diskorsi li kienu qed isiru b’mod informali ma’ uffiċjali tal-klabb Malti, dawn kienu qed ifakkruhom li fl-istaġun ta’ qabel huma kienu għamluha għall-fażi tal-Kampjonat tal-UEFA Conference League u fost l-oħrajn kienu rebħu 1-0 kontra Ajax u temmew draw kontra Galatasaray u Anderlecht, bl-objettiv li jiddemoralliżżaw il-moral tal-klann Malti.
Illum nafu li kwalunkwé strateġija u tentattiv biex jirkbu fuq il-moħħ tal-avversarji falla għaliex Ħamrun Spartans, nhar il-Ħamis li għadda reġgħu taw wirja oħra mill-aqwa. F’Riga rajna konferma tal-abiltá ta’ Ħamrun Spartans li RFS issotovalutaw qabel l-ewwel logħba u milli jidher reġgħu għamlu l-istess għat-tieni logħba.
Il-kowċ Russu Viktors Morozs
Għaldaqstamt mad-90 minuta u t-tmiem tal-partita, d-diżappunt kien wieħed akbar għal RFS tant li fil-konferenza stampa ta’ wara l-partita ta’ nhar il-Ħamis li għadda, il-kowċ Russu Viktors Morozs assuma r-responsabiltá kollha tar-riżultat mingħajr ma qal li kien se jirreżenja. “Hu diffiċli li titkellem f’mumenti bħal dawn. Jekk it-tim jitlef, anke l-kowċ ikun tilef. Għaldaqstant nerfa’ ir-responsabiltá kollha ta’ dak li ġara. Xi ħaġa marret tajba fl-attakk, imma kelna problemi kbar fid-difiża, kemm fid-dwelli diretti li bdejna nitilfu u anke s-second balls,” ikkumenta b’demmu taħt il-blat, Morozs.
