Raġel ta’ 42 sena, residenti Ħaż-Żebbuġ, inżamm taħt arrest wara li kien akkużat li sawwat lis-sieħba tiegħu waqt li kienu f’karozza li kienet qed twassalhom id-dar minn Paceville.
L-akkużat kien taħt l-influwenza tax-xorb.
Hu kien ġie akkużat li fil-29 ta’ Awwissu beżża’ lill-mara, ikkawżalha ġrieħi ħfief u kiser sentenza sospiża ta’ ħabs li kien ingħata fl-2023.
L-Ispettur Omar Zammit qal lill-Qorti li l-Pulizija raw lill-koppja tiġġieled mal-art, bil-mara tgħid lill-Pulizija li kien xurban.
Il-vittma spjegat li l-argument beda f’Paceville u kompla fil-karozza, fejn hemmhekk l-akkużat attakkaha, minkejja li hi talbet lix-xufier jieqaf
Meta ħarbet mill-karozza, huwa ġera warajha u reġa’ sawwatha.
Il-prosekuzzjoni sostniet ukoll li l-akkużat għandu tendenza suwiċidali, li ġew ikkonfermati minn messaġġi fuq il-mobile tal-vittma.
L-akkużat inqabad aktar tard f’San Pawl il-Baħar iżda rnexxielu jaħrab qabel ma reġgħu qabduh u ħaduh l-Isptar Mater Dei.
Quddiem il-Maġistrat Kevan Azzopardi, huwa wieġeb mhux ħati.
Intant, id-difiża talbet għall-ħelsien mill-arrest, iżda l-prosekuzzjoni oġġezzjonat minħabba r-riskju li jerġa’ jaħrab, bil-Qorti tiċħad din it-talba u ordnat li jinżamm taħt arrest.
