Minkejja li nbidel il-Ministru, l-aġir ta’ Johann Grech baqa’ l-istess. Dan hekk kif hu qiegħed iżomm mistur l-ammont ta’ flus li nefaq mit-taxxi tal-poplu b’rabta mal-premjiiet tal-Film Awards u n-nefqa fuq id-direttur tal-istess festival fl-2024.
Minkejja li s-sit online The Shift News għamel Freedom of Information Request, Grech ġie jaqa’ u jqum u ma tax din l-informazzjoni – ċioè, lista ta’ pagamenti li ngħataw lil dawk li rebħu premju u lid-direttur tal-festival, bid-dati, l-ammonti, u l-persuni li ngħataw il-pagamenti u għalfejn ingħataw dawn il-ħlasijiet.
Net News staqsa lill-Ministru Owen Bonnici dwar dan kollu. Iżda Bonnici, għażel li jiddefendi lil Grech.
Dan minkejja li Il-liġi hija ċara – li l-Kummissarju kellu jirrispondi fi żmien 20 ġurnata, b’estensjoni ta’ 40 jum għal talbiet li huma aktar kumplessi. Lura fit-8 ta’ April il-Kummissjoni qalet li għandha bżonn estensjoni. Iżda minn dakinhar, The Shift ma rċeviet l-ebda informazzjoni.
Għalhekk, din is-sitwazzjoni qed tiġi deskritta bħala waħda kontra l-liġi… u jidher li din mhux l-ewwel darba li ġrat taħt it-tmexxija ta’ Johann Grech
Madanakollu Owen Bonnici minflok jieħu l-passi neċessarji, baqa’ joħroġ għonqu għal Johann Grech – l-istess Grech li elezzjoni wara l-oħra jispiċċa jagħti s-servizzi tiegħu lill-Partit Laburista fil-kampanji elettorali.
Intant, skont The Shift, jidher li dawk li ħadu premju s-sena l-oħra, għadhom qed jistennew sabiex jitħallsu. Azzjoni li ġiet deskritta bħala waħda skandaluża, u minkejja din is-sitwazzjoni – din is-sena, sar festival ieħor li fih intefqu l-miljuni tal-ewro mit-taxxi tal-poplu.
Iżda meta ssikkajna lil Bonnici dwar dan, il-Ministru għażel li ma jweġibx u qed jinsisti li dejjem hemm lok ta’ titjib.
L-iskandli fil-qasam responsabbli minnu Owen Bonnici mhux qed jonqsu – hekk kif bosta baqgħu skantati bil-pagamenti eżorbitanti fil-Festival ta’ Mużika Mużika ta’ din is-sena.
The Shift News żvela kif fost oħrajn il-preżentaturi tħallsu €7,500 kull wieħed, u l-uffiċjal Laburista Jason Micallef tħallas €5,000 talli kiteb l-iscript taż-żewġ serati.
Dejjem taħt il-barka tal-Ministru Owen Bonnici…u l-Kap Eżekuttiv ta’ Festivals Malta u bidillu tal-Prim Ministru Robert Abela, Aaron Zahra.
