Il-Ħadd, l-atleta Malti Neil Agius beda sfida oħra li biha qed jimmira li jagħmel 7 għawmiet f’7 ijiem fuq distanza ta’ 42 kilometru madwar il-kosta t’Għawdex.
Neil Agius beda din l-isfida għall-ħabta tas-6 tal-Ħadd filgħodu fil-bajja tar-Ramla l-Ħamra.
F’din l-isfida, hu jrid jgħum mal-15-il siegħa f’7 t’ijiem għalkemm dan il-ħin jaf ivarja minħabba l-kundizzjonijiet tal-baħar, u elementi oħra li m’hemmx kontroll fuqhom.
Matul din l-isfida, fil-ħin li ma jkunx fl-ilma, hu se jkun qed jistrieħ, jiekol u jittieħdu t-testijiet li jkun hemm bżonn għar-riċerka sabiex jiddeterminaw l-abbiltà tal-ġisem li jgħum mal-15 il-siegħa kuljum għal sebat ijiem f’baħar miftuħ.
Ftit tal-ġimgħat ilu, Net News kien tkellem ma’ Neil Agius fejn qalilna li l-iskop ta’ din l-isfida hu sabiex jara l-limitu tal-bniedem u sabiex jifhem aħjar x’ikun qed iseħħ lill-ġisem f”sitwazzjonijiet estremi.
L-atleta hu magħruf għall-kisbiet tiegħu fix-xena tal-għawm u fuq distanzi twal, fejn fl-aħħar sfida rajnih jikser ir-rekord nazzjonali hekk kif hu għamel għawma ta’ 140 kilometru.
Din id-darba, hu se jkun qed jibda din l-isfida kuljum minn postijiet differenti, bil-qofol mistenni jintlaħaq fis-6 ta’ Settembru – nhar is-sibt li ġej.
