Alex Perici Calascione
Il-Viċi Kap
Partit Nazzjonalista
Jiena kont diġà naqqast mix-xogħol tal-Qorti u huwa kien jipprattika l-aktar f’kamp legali li jiena bħala regola ma nipprattikax.
Però xi drabi konna mistednin fl-istess programmi fuq in-Net TV. Kienet tispikka fih l-arti kommunikattiva, fil-kliem ċar u dirett li bihom kien jesprimi ruħu u bil-mod kif iħares dritt lejn il-camera, biex min ikun qiegħed jisma’ jħoss li qiegħed ikellem personalment lilu.
Imbagħad wasal iż-żmien li fih Bernard Grech daħal bi prominenza fix-xena politika.
Kien żmien fejn il-Partit Nazzjonalista kien għaddej minn perjodu diffiċli; żmien ta’ sfidi kbar; ta’ konflitti interni li dgħajfu anke ħbiberiji antiki; ta’ żbalji evitabbli magħmula minn kull naħa tad-dibattitu intern.
Jiena għext kważi sentejn minn dak iż-żmien bħala President tal-Kumitat Eżekuttiv li kien ix-xena ta’ ħafna minn dak li kien għaddej. Meta nħares lura u naħseb fuq dak li għaddejna minnu napprezza ferm aktar fejn qegħdin illum.
Kien fil-kuntest ta’ dan il-mument delikat u determinanti fl-istess ħin, li Bernard Grech ġie elett Kap tal-Partit.
Ma kienx mument ta’ glorja; wisq anqas mument fejn kollox kien għaddej ward u żahar. Kien hemm ħafna x’kellu jissewwa u jerga’ jinbena mill-ġdid, u biex tgħaxxaqha, b’elezzjoni ġenerali inqas minn sena u nofs wara.
Min jersaq ’il quddiem għall-kariga ta’ Kap tal-Partit jaf li hekk kif jiġi elett, ħajtu ma tkunx effettivament aktar tiegħu. Din diġà hija sfida fiha nnifisha anke fl-aħjar żmien. Meta xi ħadd jagħżel li b’dawn l-isfidi kollha anke fi żmien seren, jidħol għal din il-kariga fi żmien imqanqal u diffiċli, allura dan jixhed ħafna l-karattru, l-lealtà u l-integrità tal-persuna.
Dan kien eżatt li għamel Bernard Grech li sa mill-ewwel ġurnata, ħadem, ħafna drabi bil-kwiet u bla daqq ta’ trombi, biex isaħħaħ dak li kien iddgħajjef.
Kelli l-opportunità li nara dan fl-aħħar xhur tat-terminu tiegħi fit-tmexxija tal-Eżekuttiv u mbagħad aktar ’il quddiem f’ħidmieti f’dawn l-aħħar sentejn.
Gratitudni
Huwa għalhekk li l-Partit Nazzjonalista jibqa’ grat lejn Bernard Grech, tal-lealtà u l-impenn tiegħu sa mill-ewwel ġurnata favur l-għaqda; id-djalogu u s-sens komun kif ukoll tal-mod kif ta’ prova ċara tal-irġulija u s-sens qawwi ta’ responsabbiltà lejn il-Partit u lejn il-pajjiż bil-fatti u mhux bil-kliem anke fil-mument tal-istess riżenja tiegħu.
Kif stqarrejt fl-aħħar Kunsill Ġenerali, mhux dejjem qbilna f’kollox u mhux dejjem rajna l-affarijiet mill-istess lenti. Nistqarr sinċerament però li kien ta’ unur u privileġġ għalija li f’dawn is-sentejn bhala Viċi Kap ta’ dan il-Partit tagħna, ħdimna flimkien, iddiskutejna ma’ xulxin u għexna, flimkien mal-Partit kollu, mumenti ta’ qsim il-qalb liema bħalhom.
Qsamna flimkien it-telfiet ta’ Frederick Azzopardi; Robert Arrigo; Karl Gouder; Francis Zammit Dimech u ta’ ħbieb leali oħra. Fraħna flimkien bir-riżultat tal-elezzjonijiet ta’ Ġunju tas-sena l-oħra. Rajt ukoll lil Bernard, Kap tal-Partit, lura fl-uffiċċju tiegħu fl-istess ġurnata li miet l-għażiż missieru.
Ma jistax jonqos li r-ringrazzjament tagħna jestendi wkoll għal Anne Marie, sieħba dejna u ta’ sostenn kbir, kif ukoll għal Maria u Neil.
Bernard Grech żgur li ser iħalli Partit li mexa sew ’l quddiem f’ħafna aspetti taħt it-tmexxija tiegħu.
Ta’ dan nibqgħu żgur rikonoxxenti.
Dan l-artiklu deher f’Il-Mument tal-Ħadd 31 ta’ Awwissu, 2025.
