Bernard Grech
Il-Kap tal-Partit
Ħames snin ilu, kont imsejjaħ biex immexxi lill-Partit Nazzjonalista f’mument fejn ħafna kienu tilfu t-tama. F’mument fejn ħafna raw futur mudlam għall-partit li tant għamel ġid lil Malta, u li fil-memorja kollettiva tal-poplu Malti dejjem kien assoċjat mal-ġustizzja, il-libertà u r-riformi. Kien mument diffiċli, imma wkoll wieħed li tani ċ-ċans biex naqdi u nservi bi mħabba ġenwina għal pajjiżna.
F’dawn il-ħames snin, għaddejna minn kollox – mil-ġlieda biex nerġgħu nsibu l-vuċi tagħna, sal-ħidma bla waqfien biex inġibu lill-partit eqreb lejn in-nies. Kien vjaġġ ta’ sfidi, ta’ riflessjoni, imma fuq kollox, ta’ tama u determinazzjoni. Illum, meta nħares lura, inħoss sodisfazzjon li rajt partit li mhux biss reġa’ sab saqajh, imma li beda wkoll jimxi ’l quddiem b’viżjoni ċara u bi proposti serji għall-ġid tal-poplu.
Il-politika hi ħafna iktar minn vot jew elezzjoni. Il-politika vera hija s-servizz. U għalija, is-servizz politiku ma kien qatt dwar il-poter personali, imma dwar li nagħti mill-aħjar tiegħi biex Malta tkun aħjar. Ma kienx faċli – il-kritika kienet (u tibqa’) parti mill-ħajja ta’ kull mexxej. Iżda kont dejjem determinat li ma nċedix quddiem l-attakki, il-kritika inġusta jew il-pressjoni. Għaliex kont naf li l-kawża li kont qed naħdem għaliha kienet waħda ikbar minni – il-ġid komuni, il-ġustizzja, u Malta aħjar għal uliedna.
Wieħed mill-akbar sodisfazzjonijiet tiegħi kien li nara kif il-Partit Nazzjonalista reġa’ sar vuċi qawwija ta’ serjetà u bilanċ fil-Parlament. Illum, il-PN ma jibżax jitkellem favur min hu vulnerabbli, favur l-ambjent, favur il-ħarsien tal-istituzzjonijiet, favur ekonomija ġusta u sostenibbli. Jum wara jum, bħala Oppożizzjoni, ħdimna b’dedikazzjoni biex nirrappreżentaw lin-nies li mhumiex milqugħin mill-establishment tal-Gvern. U għamilt dan bil-kuxjenza nadifa li kont qed nagħmel dak li hu sewwa – mhux dak li hu faċli.
Tim magħqud b’viżjoni komuni
Matul dawn is-snin, kellna wkoll ċans nibnu tim – tim ta’ nisa u rġiel ġodda u ta’ esperjenza li għandhom għal qalbhom il-futur ta’ pajjiżna. Il-PN illum għandu persuni kapaċi f’kull qasam – mid-drittijiet soċjali sal-ambjent, mill-ekonomija diġitali sal-kultura. Bniedem waħdu ma jagħmilx differenza – imma tim magħqud, b’viżjoni komuni u valuri sod, jista’ verament ibiddel id-direzzjoni ta’ pajjiż.
Waħda mir-realtajiet li kont dejjem konxju minnha hi li ħafna nies ma jridux jisimgħu biss kritika – iridu jkunu jafu x’qed nipproponu. U għalhekk, fl-aħħar snin, ħdimna biex inwasslu proposti konkreti, serji u mibnijin fuq l-esperjenza u r-riċerka. Dokumenti bħall-viżjoni ekonomika ġdida, l-iżvilupp sostenibbli, u r-riformi istituzzjonali kienu sinjal ċar li l-PN huwa lest mhux biss biex jikkritika, imma biex imexxi b’serjetà u b’direzzjoni.
Il-politika f’Malta saret iebsa – u forsi kultant maħmuġa – iżda jiena baqgħet fija t-tama li l-valuri għadhom jgħoddu. Li l-ġustizzja għadha tirbaħ fuq il-korruzzjoni. Li l-verità għadha tista’ titkellem b’leħen qawwi kontra l-gideb. U fuq kollox, li l-poplu Malti għandu għaqal biżżejjed biex jagħraf min verament għandu għal qalbu l-ġid tiegħu.
Illum, wara ħames snin ta’ tmexxija, jiena grat lejn kull persuna li tatni l-fiduċja tagħha. Grat lejn dawk li appoġġjawni, iżda wkoll lejn dawk li sfidawni – għax anke l-kritika tagħmlek aħjar, jekk tismagħha bil-għaqal. Jiena grat lejn familti, li kienet il-blata tiegħi f’mumenti diffiċli. Grat lejn kull kandidat, attivist u voluntier li jaħdem bla heda għal dal-partit u għal pajjiżna.
Il-ġejjieni jibda issa. Ħames snin ta’ tmexxija kienu l-bidu ta’ vjaġġ – mhux it-tmiem tiegħu. Il-mira tiegħi tibqa’ waħda: li nara lil Malta miexja ’l quddiem b’serjetà, b’ġustizzja, u b’opportunità għal kulħadd. Nibqa’ nemmen li bil-PN magħqud u b’saħħtu, Malta tista’ terġa’ ssir dak il-post fejn kulħadd iħossu parti, fejn is-suċċess ma jkunx għal ftit, u fejn il-ġustizzja tkun il-pedament ta’ kull deċiżjoni.
Il-futur mhux biss jista’ jkun aħjar – irid ikun aħjar. U jiena lest inkompli nagħti dak kollu li nista’ biex hekk jiġri.
Dan l-artiklu deher f’Il-Mument tal-Ħadd 31 ta’ Awwissu, 2025.
