“Morna lura għall-ġranet fejn l-ebda diżgrazzja mhi permanenti u fejn l-ebda bieb ma jingħalaq totalment. Ġranet fejn falliment politiku u pubbliku kważi qatt ma jkun ikkastigat – anzi jkun riċiklat”.
Iddikjara dan l-editorjal tat-Times of Malta meta spjega dak li kien deskritt bħala ċ-ċiklu familjari fil-politika Maltija fejn politikant ikollu joħroġ mix-xena taħt dell ta’ kontroversja imma jerġa’ lura fil-ġimgħat, xhur jew anke snin wara f’irwol li jħallsu għalih iċ-ċittadini Maltin u Għawdexin mit-taxxi tagħhom.
L-aktar każ riċenti huwa dak tal-eks Deputat Mexxej tal-Labour Chris Cardona li fl-aħħar jiem ġie appuntat konsulent tal-policy taż-żagħżagħ fil-Ministeru tal-Edukazzjoni. Bl-editur jistaqsi x’inhuma l-ideat li fil-verità Cardona qed iġib għal dan is-settur.
L-editorjal jispjega illi minbarra li Cardona huwa avukat, u kien anke Ministru tal-Ekonomija taħt it-tmexxija ta’ Joseph Muscat – huwa kien investigat b’rabta ma’ pjan li allegatament kellu mal-aħwa Degiorgio sabiex joqtlu lill-ġurnalista Daphne Caruana Galizia – meta Cardona kien deputat mexxej tal-Labour. Xi ħaġa li hu qed jiċħad!
Cardona huwa wkoll isem sinonimu mal-burdell fil-Ġermanja waqt li kien fuq żjara f’isem il-Gvern tal-Labour.
L-editur jispjega illi tħares kemm tħares lejn ic-CV ta’ Chris Cardona wieħed isib diffikultà kbira biex isib evidenza dwar is-suppost esperjeza li għandu fil-poicy għaż-żagħżagħ. Iżda minkejja dan, hu qed jitħallas 37,000 fis-sena, bl-allowances għal dawk li huma 10 sigħat ta’ ħidma fil-ġimga bħala konsulent.
Cioè – 70 ewro fis-siegħa, f’pajjiż fejn ir-rata medja ta’ ħlas fis-siegħa hija ta’ €9.
L-editorjal jispjega wkoll illi din il-mossa mhux waħda li tissorprendi. U kulħadd qed jifhem li Azzopardi Tanti ma impjegax lil Cardona sabiex jassisti fil-policy – imma sabiex Cardona jtih imbuttatura fl-elezzjoni ġenerali li ġejja fit-tmien distrett.
Apparti Chris Cardona, anke Neville Gafà mill-klikka estremista tal-Labour reġa’ ddaħħal lura f’Kastilja.
L-editorjal semma’ anke lil Clint Camilleri u Clayton Bartolo – fejn spjega li l-Gvern għamel ftit li xejn fejn tidħol kontabbiltà fir-rigward ta’ dawn iż-żewġ esponenti.
