Matul il-jum tat-Tlieta, NET News żar il-Barracks tal-Forzi Armati f’Ħal Luqa, fejn kellna l-opportunità nitkellmu ma’ Sergio Fenech, il-kappillan tal-istess armata.
Fl-aħħar ġimgħat, Fr Sergio beda programm ġdid ta’ reklutaġġ ta’ kappillani fi ħdan il-Forzi Armati sabiex ikunu jistgħu jassistu lis-suldati u l-membri tal-AFM.
Fr Sergio spjega kif hu attenda l-korsijiet ta’ dawk li se jsiru surġenti, kif ukoll il-kors tal-ETOS li jidħol fid-dettall dwar il-valuri u l-etika tal-Forzi Armati.
Hu attenda wkoll taħriġ tal-cadets sabiex verament jifhem xogħolhom.
Apparti minn hekk, hu għamel kors ta’ 3 xhur l-Amerika apposta għall-kappillani militari, fejn tgħallem kif jassisti u jgħin lis-suldati u l-membri tal-Forzi Armati.
Ma’ Net News, hu tkellem ukoll dwar il-kappella li hemm fil-barracks tal-Forzi Armati f’Ħal Luqa, fejn fost oħrajn semma’ kif f’din il-kappella hemm relikwarju tal-Beatu Nazju Falzon, li hu kkunsidrat bħala l-patrun tal-Forzi Armati.
F’din il-kappella hemm l-ismijiet ta’ kull persuna li tilfet ħajjitha waqt li kienet qed isservi mal-Forzi Armati, fosthom il-5 persuni li tilfu ħajjithom abbord il-P23 fl-1984 li kienet splodiet ftit ‘il barra minn Għawdex. Hemm ukoll il-plakka li tingħata lill-qraba tal-persuni li jkunu tilfu ħajjithom.
Fr Sergio Fenech temm billi spjega li hu qed jippjana li jkabbar dan it-taħriġ, billi jinvolvi iżjed lill-membri tal-Forzi Armati li diġà qegħdin jgħinu fi ħdan il-kappella.
