Jiem wara li sar magħruf li Birkirkara laħqu ftehim ma’ Stefano De Angelis biex it-tnejn itemmu l-kuntratt ta’ bejniethom, l-amministrazzjoni tal-klabb qed taħdem biex tasal għal deċiżjoni finali għal min se jkun il-kowċ il-ġdid tal-Istripes.
Sal-lum, Net News għadu ma rrapporta xejn dwar l-aħħar żviliuppi marbuta mal-ħatra tal-kowċ il-ġdid ta’ Birkirkara, iżda sezzjonijiet tal-midja lokali għamlu referenza lejn numru ta’ kowċis, fil-maġġoranza Maltin, li potenzjalment jistgħu jkunu l-għażla tal-klabb bħala l-kowċ suċċessur tat-Taljan. Sorsi li tkellmu ma’ Net News qalulna li wħud minn dawn l-ismijiet jidher li kienu spekulattivi, u ‘l bogħod mil-veritá.
Sal-lum il-veritá hi waħda; dik li Birkirkara qed jieħdu l-ħin kollu tagħhom biex jagħżlu l-isem tal-kowċ il-ġdid, peress li l-impenn li jmisshom jilagħbu l-Istripes hu wara ż-żewġ partiti interanzzjonali tat-tim nazzjonali Malti. S’issa m’hemmx isem li jinsab qrib li jitħabbar bħala l-kowċ il-ġdid tal-Istripes, però minn informazzjoni li għandu Net News, jidher li Birkirkara, qed juru interess fil-kowċ nazzjonali Malti ta’ taħt il-21 sena, Davide Mazzotta.
Mhux magħruf jekk it-Taljan ta’ 55 sena huwiex interessat biex jassumi r-rwol tal-persuna responsabbli mit-tmexxija teknika ta’ Birkirkara, anke għaliex sal-lum għadu ma sar ebda kuntatt mill-klabb, mal-eks kowċ interim ta’ Malta, peress li Birkirkara qed jażgħlu li jżommu l-etiká, u ma jkelmux lil Mazzotta f’perjodu fejn l-istess kowċ u l-bqija tal-istaff tekniku tiegħu, jinsabu iffukati fuq il-preparazzjoni tal-impenji li jmissu jilgħab fil-jiem li ġejjin, it-tim nazzjonali ta’ taħt il-21 sena.
Sorsi qrib il-klabb Karkariz, qalulna li Mazzotta jkun l-għażla ideali għal dak li qed ifittex il-klabb fil-mument. Il-possibiltá ta’ Mazzatta ma’ Birkirkara taf tkun diffiċli ukoll peress li l-kowċ hu marbut b’kuntratt mal-MFA, u kwalunkwé diskussjonijiet finalment iridu jiġu diskussi mal-assoċjazzjoni.
Madankollu, Birkirkara qed iħarsu lejn alternattivi oħra. Kelliem għall-klabb ikkonferma ma’ Replay li fl-aħħar jiem, kien hemm diversi kowċis Maltin u barranin, inkluż ismijiet li qatt qabel ma kellhom esperjenza f’Malta, li għamlu kuntatt mal-klabb biex jesprimu l-interess tagħhom f’dan ir-rwol.
Hu mifhum li fil-jiem li għaddew, Birkirkara kienu f’diskussjonijiet ma’ Mosta, sabiex jiksbu lid-Direttur Tekniku tagħhom, Mario Muscat biex jifforma parti integrali mill-istaff ta’ kowċis fit-tmexxija ta’ Birkirkara. Madankollu jidher li kwalunkwé tentattiv bejn it-tnejn falla, u Mosta għamluha ċara li la darba Muscat hu marbut b’kuntratt magħhom, mhumiex interessati li jħallu lill-eks gowlkiper internazzjonali Malti jħalli l-klabb.
Fid-dawl ta’ dan il-fatt, Birkirkara qed jagħżlu li ma jgħaġġlux fid-deċiżjoni importanti li jridu jieħdu u qed jibqgħu jistennew qabel jaslu għal deċiżjoni finali.
Intant għalissa, l-iskwadra qed titmexxa mill-assistant kowċ li kellu De Angelis miegħu, it-Taljan Alessandro Caridi.
