Il-President tar-Russja, Vladimir Putin, qal li wasal għal forma ta’ ftehim mal-President Amerikan Donald Trump dwar it-tmiem tal-gwerra fl-Ukrajna…Madankollu, hu wkoll sinifikanti li Putin ma qalx jekk għandux jaqbel dwar taħditiet għall-paċi potenzjali mal-President Ukren, Volodymyr Zelensky.
Putin żvela dan issa, jiem wara li hu kien iltaqa’ ma’ Trump waqt is-summit ta’ Alaska.
U waqt diskors li kien qed jagħmel fiċ-Ċina, Putin kompla jiddefendi d-deċiżjoni tiegħu biex jinvadi lill-Ukrajna u fejn mill-ġdid waħħal fil-Punent għall-gwerra li ilha minn Frar tal-2022.
Wara s-summit ta’ Alaska, kien irrappurtat li r-Rappreżentant Speċjali Amerikan, Steve Witkoff u Vladimir Putin kienu qablu dwar il-garanziji tas-sigurtà għall-Ukrajna bħala parti minn ftehim potenzjali għall-paċi fil-futur. Iżda sallum għad jonqos għall-konferma uffiċjali min-naħa ta’ Moska.
Id-diskors tallum minn Putin kien qed isir fil-belt ta’ Tianjin waqt is-summit ta’ Shanghai Co-operation Organisation – u fejn hu ltaqa’ mal-President Ċiniż, Xi Jinping flimkien mal-Prim Ministru Indjan, Narendra Modi.
Putin, intant, irringrazzja lil Xi Jinping u lil Modi għall-isforzi tagħhom biex, skont hu, jiffaċilitaw ir-riżoluzzjoni tal-kriżi Ukrena.
Iżda l-President Russu ma waqafx jakkuża lill-Punent bħala ‘il-kaġun tal-gwerra’, fost ir-referenzi għall-allegati sforzi tal-Punent biex l-Ukrajna tissieħeb bis-sħiħ fl-Alleanza tan-NATO…..Xi ħaġa li r-Russja, fi kliemu, ‘ma tistax taċċetta’.
