Żvolta fil-każ ta’ Paschalino Cefai u l-Avukat Mario Mifsud, li kienu qed jiffaċċjaw akkużi ta’ theddid kontra xulxin billi issa spiċċaw jagħmlu paċi. Fil-qorti reġa’ deher episodju mhux tas-soltu li ġej minn ġlieda verbali li seħħet f’Lulju.
L-imputati, Paschalino Cefai u l-Avukat Mario Mifsud, li kienu qed jiffaċċjaw akkużi ta’ theddid u ksur tal-ordni pubblika, dehru quddiem il-Maġistrat Leonard Caruana ħdejn xulxin, jitkellmu u anke itaptpu fuq dahar xulxin.
Iż-żewġ irġiel ikkonfermaw li “għamlu l-paċi” u rrinunzjaw għall-akkużi li kienu għamlu kontra xulxin. B’hekk, l-akkużi serji ta’ insulti u theddid tneħħew, iżda l-akkuża ta’ ksur tal-paċi tibqa’ għaddejja. Cefai rrinunzja wkoll għall-allegazzjoni li l-Maġistrat Joe Mifsud, ħu l-Avukat Mario Mifsud, kien allegatament daħħal whisky fil-Faċilità Korrettiva ta’ Kordin u xrobu miegħu.
L-avukat Lennox Vella, li qed jidher għall-Maġistrat Joe Mifsud, qal li l-klijent tiegħu aċċetta l-apoloġija ta’ Cefai iżda kkundanna attakki fuq il-ġudikatura. Fil-proċeduri tressqu disa’ xhieda biex jispjegaw il-“ħerba” li saret waqt is-seduta ta’ Lulju, li kienet relatata ma’ każ ta’ traffiku fejn Cefai kien akkużat u Mario Mifsud kien qed jidher bħala avukat tal-vittma.
Ix-xhieda kkonfermaw li l-affarijiet “skalaw” wara li Cefai semma lil ħu Mifsud. Il-Maġistrat Simone Grech, li kienet presediet is-seduta in kwistjoni, qalet li l-eskalazzjoni seħħet wara li Cefai semma lill-Maġistrat Joe Mifsud.
Cefai kien allega li l-Maġistrat Mifsud ħa flixkun whisky fil-ħabs u xorbu flimkien. Iżda Alex Dalli, li kien direttur tal-CCF fi żmien il-ħabs ta’ Cefai, xhed li Mifsud dejjem għadda minn spezzjonijiet tas-sigurtà u qatt ma nstab b’alkoħol fuqu.
Dalli ddeskriva lil Cefai bħala “diffiċli” imma qal li dejjem kellu relazzjoni tajba miegħu. Il-kawża se tkompli fit-25 ta’ Settembru meta jinstemgħu żewġ xhieda oħra relatati mal-“ħerba” li seħħet f’dik is-seduta.
