L-eks avukat tal-Faċilità Korrettiva ta’ Kordin, Mario Mifsud, mistenni jitressaq il-Qorti fuq akkużi kriminali relatati ma’ inċident tat-traffiku li seħħ fil-Ħamrun, fit-3 ta’ Ġunju li għadda. Mifsud, ta’ 49 sena mill-Mosta, kien qed isuq mutur fi Triq il-Kbira San Ġużepp meta laqat raġel anzjan li kien qed jaqsam it-triq. Huwa mistenni jitressaq il-Qorti b’ċitazzjoni.
Kollox jindika li Mifsud waqaf, assista lill-vittma u ċempel l-ambulanza, iżda wara li r-raġel ittieħed l-isptar, huwa telaq minn fuq il-post mingħajr ma informa lill-pulizija. Il-pulizija bdew investigazzjoni estensiva, billi inizjalment kienu jafu biss li kien hemm mutur involut iżda ma kellhomx id-dettalji tar-reġistrazzjoni.
Wara li eżaminaw filmati tas-CCTV, irnexxielhom jidentifikaw il-mutur u ħarġu mandat ta’ arrest. Mifsud ġie msejjaħ fil-pulizija biex jiġi investigat u issa mistenni jiġi akkużat li kkawża ġrieħi gravi involontarjament minħabba negliġenza jew nuqqas ta’ ħila, kif ukoll li saq b’mod perikoluż jew ħażin.
Se jkun ukoll akkużat li naqas milli jżomm fil-post ta’ inċident fejn persuna oħra tkun ġarrbet ġrieħi jew sar ħsara, kif ukoll li ma ta l-ebda dettalji lill-awtoritajiet. Mistosqi minn Newsbook, l-Avukat Mifsud ikkonferma li kien involut fl-inċident iżda ċaħad li ma kienx assista.
Huwa spjega li kien qed isuq bil-mod, bl-anzjan jaqa’ quddiemu u l-mutur laqtu ftit bir-rota. Huwa ċempel 112 u stenna sakemm waslet l-ambulanza u r-raġel rikeb magħha, wara li hu telaq mill-post. Huwa sostna li l-pulizija kkuntattjawh ġimgħa wara biex imur l-għassa iżda sa issa għadu ma ġiex notifikat b’xi akkużi.
