Jilqa’ wkoll l-impenn tal-Kummissjoni Ewropea favur il-ħarsien tal-ġurnaliżmu indipendenti
Il-Partit Nazzjonalista jilqa’ l-messaġġ tal-Kummissjoni Ewropea fil-kundanna bla riżerva tal-aggressjoni Russa fl-Ukrajna u issa anke fi spazju territorjali tal-Polonja.
Jilqa’ wkoll il-kundanna bla ewkivoċi tal-katastrofi umanitarja li qed tiżviluppa f’Gaza, ikkawżata bl-intervent militari tal-Iżrael.
Il-PN jinnota b’sodisfazzjon ukoll l-impenn muri mill-President tal-Kummissjoni Ewropea Ursula von der Leyen dalgħodu waqt id-diskors dwar l-Istat tal-Unjoni favur il-ħarsien tal-ġurnaliżmu indipendenti, anke fid-dawl ta’ dak li għadda minnu pajjiżna f’dan il-qasam.
Il-Partit Nazzjonalista jibqa’ jinsisti li l-ebda Gvern m’għandu jabbuża mill-poter tiegħu permezz ta’ reklamar statali jew billi jpoġġi pressjoni biex jipprova jsikket lill-ġurnalisti.
Il-Partit Nazzjonalista jaqbel ukoll mal-kundizzjonijiet li qed tagħmel il-Kummissjoni b’rabta mal-fondi Ewropej, jiġifieri li jkun hemm rabta diretta bejn ir-rispett ta’ pajjiż għas-saltna tad-dritt u l-fondi Ewropej li jingħata. Dan jassigura li l-pajjiżi tal-Unjoni Ewropea jirrispettaw verament il-liġijiet tagħhom għax iċ-ċittadini Ewropej jixirqilhom assigurazzjoni li l-fondi tal-UE ma jiġux abbużati mill-klijenteliżmu jew il-korruzzjoni.
Il-bilanċ bejn il-kompetittività u l-protezzjoni taċ-ċittadin huwa kruċjali. Il-Partit Nazzjonalista jemmen li t-tnaqqis tal-burokrazija fejn possibbli huwa tajjeb madankollu m’għandux isir b’detriment għad-drittijiet taċ-ċittadin għal xogħol adegwat, tal-protezzjoni tal-ambjent jew tas-sigurtà soċjali.
Il-Partit Nazzjonalista, bħala partit li dejjem fittex l-innovazzjoni u l-progress teknoloġiku, jilqa’ l-investiment fl-Intelliġenza Artifiċjali u d-diġitalizzazzjoni, u jinsisti li stati żgħar bħal tagħna ma jitħallewx lura fl-aċċess għall-finanzjament u l-infrastruttura tal-innovazzjoni.
Dan intqal fi stqarrija mix-Shadow Minister għall-Affarijiet Barranin u Ewropej, u l-Kummerċ Beppe Fenech Adami u s-Segretarju Internazzjonali PN Beppe Galea.
