Raġel ta’ 50 sena, li huwa bla xogħol, ġie miżmum taħt arrest wara li allegatament ikkawża ġrieħi ħfief lil ħuh waqt argument dwar wirt. L-imputat deher il-Qorti, l-Erbgħa akkużat li kkaġuna ġrieħi ħfief u li wassal lil ħuh biex jibża’ li seta’ tintuża vjolenza kontrih.
Il-validità tal-arrest tqajmet mill-avukat tal-għajnuna legali Victor Bugeja, li staqsa għaliex il-klijent tiegħu kellu jiġi arrestat għal ġrieħi ħfief, u sostna li “is-sistema tal-arrest u tal-għajnuna legali qed tiġi abbużata”.
Min-naħa tiegħu, l-Ispettur Christian Cauchi spjega ċ-ċirkostanzi tal-każ, fejn irrimarka li rapport kien ġie ppreżentat lit-Taqsima tal-Vjolenza Domestika. Huwa qal li l-akkużat allegatament imbotta lil ħuh u poġġa subgħajh f’għajnejh. Il-Qorti kkonfermat il-validità tal-arrest.
L-akkużat wieġeb mhux ħati għall-akkużi miġjuba kontrih, u saret talba għall-ħelsien mill-arrest. Il-prosekuzzjoni oġġezzjonat fuq il-bażi li kien hemm biża’ ta’ kontaminazzjoni ta’ xhieda u li seta’ jwettaq reat ieħor.
Il-Qorti ċaħdet it-talba għall-ħelsien mill-arrest u imponiet ordni ta’ protezzjoni kif ukoll ordni ta’ trattament.
Il-prosekuzzjoni qed titmexxa mill-Ispettur Christian Cauchi, filwaqt li l-avukat Victor Bugeja qed jidher għall-akkużat.
