Il-Grupp MeDirect lesta l-akkwist tal-Banka CREDITAS, li hija parti mill-Grupp Creditas ibbażat fir-Repubblika Ċeka u li għandu interessi fis-servizzi finanzjarji, proprjetà immobbli u l-enerġija.
Dan l-akkwist isegwi l-ftehim ta’ xiri ta’ ishma f’Novembru tal-2024 u l-approvazzjoni regolatorja sussegwenti mill-Bank Ċentrali Ewropew (BĊE) f’Awwissu tal-2025. B’dan, l-azzjonist strateġiku ġdid, il-Grupp MeDirect għandu l-għan li jħaffef l-espansjoni tiegħu u jesplora opportunitajiet ġodda għat-tkabbir.
Il-Grupp MeDirect, imwaqqaf f’Malta fl-2004, ikkonferma ruħu bħala bank sfidant pan-Ewropew. Bħala l-ewwel bank diġitali f’Malta, l-organizzazzjoni toffri lill-klijenti taħlita unika ta’ bbankjar u servizzi ta’ investiment mobbli u diġitali, flimkien ma’ servizzi personalizzati permezz tal-fergħat tagħha u ċ-ċentru ta’ kuntatt ibbażat f’Malta. L-espansjoni tal-Grupp bħala bank purament diġitali fil-Belġju rat lil MeDirect isir it-tielet l-akbar bank Malti b’aktar minn 160,000 klijent mal-Grupp kollu u aktar minn €6 biljun f’assi.
Jiří Hrouda, CEO tal-Grupp Creditas, qal: “Aħna kuntenti li nilqgħu lil MeDirect fil-familja Creditas. Għalkemm MeDirect diġà wera tkabbir sostenibbli impressjonanti, nemmnu bis-sħiħ li hemm potenzjal enormi għal aktar żvilupp. Bi pjattaforma ta’ bbankjar diġitali sigura u tal-ogħla livell, żviluppata mit-tim teknoloġiku bbażat f’Malta, u sett uniku ta’ servizzi bankarji, ta’ investiment u ta’ self kemm għall-klijenti individwali kif ukoll dawk korporattivi, MeDirect u l-Grupp Creditas jaqsmu l-istess DNA u jaspiraw li jservu lill-aktar klijenti li jitolbu ħafna.”
Filwaqt li l-Grupp MeDirect issa se jsir sussidjarja ta’ Banka Creditas, li ilha topera fir-Repubblika Ċeka mill-2016, il-marka MeDirect se tinżamm. “Illum jimmarka l-bidu ta’ kapitlu ġdid fil-vjaġġ ta’ tkabbir ta’ MeDirect. Li jkollna lil Banka Creditas bħala l-azzjonist tagħna jfisser li issa għandna saħħa finanzjarja akbar biex inkompli nikkontestaw il-pajsaġġ bankarju tradizzjonali,” qal Jean-Claude Maher, Kap Eżekuttiv tal-Grupp MeDirect.
L-ambizzjonijiet ta’ MeDirect għal Malta se jiffokaw fuq il-provvista ta’ sett komplut ta’ prodotti u servizzi li jagħtu kemm lill-klijenti individwali kif ukoll lill-kumpaniji l-għodod biex jimmaniġġjaw il-finanzi tagħhom kif jixtiequ.
Bħala bank Malti b’pjattaforma innovattiva, MeDirect diġà joffri aċċess għal aktar minn 4,300 prodott finanzjarju, rati ta’ imgħax kompetittivi fuq kontijiet tad-depożitu b’aċċess immedjat u fiss, kontijiet bankarji ta’ kuljum b’diversi muniti u pjattaforma diġitali personalizzata għal klijenti korporattivi. Barra minn hekk, għandu reputazzjoni stabbilita għal rispons u proċessar veloċi ta’ self għall-proprjetà. Fil-ġimgħat li ġejjin, b’kapital li se jiġi investit minn Banka Creditas, MeDirect se jaħdem biex jiżgura li jista’ joffri firxa saħansitra usa’ ta’ servizzi lir-residenti u n-negozji kollha f’Malta, filwaqt li jżomm il-fokus tiegħu fuq l-effiċjenza u l-klijent.
“Banka CREDITAS tirrappreżenta aktar minn sempliċement appoġġ finanzjarju, iżda allinjament ta’ valuri u viżjoni, fejn iż-żewġ organizzazzjonijiet jaqsmu impenn biex jikkontestaw l-istatus quo. Il-klijenti Maltin, kemm individwali kif ukoll korporattivi, jistgħu jkunu ċerti li MeDirect se jibqa’ bank Malti b’sens ta’ kburija, bis-sħiħ impenjat li jilqa’ l-ħtiġijiet tal-klijenti u jappoġġja l-iżvilupp ekonomiku tal-pajjiż. Stennew aktar żviluppi fil-ġimgħat li ġejjin,” temm jgħid Maher.
