Wara l-waqfa tas-sajf, illum reġa’ fetaħ il-Parlament u diversi ħarġu jipprotestaw kontra il-liġijiet tal-ippjanar li qed jipprova jgħaddi l-Gvern ta’ Abela.
Il-Gvern ta’ Robert Abela, b’dawn l-abbozzi, għamilha aktar diffiċli sabiex permess jiġi revokat wara appell.
Dan għaliex il-bidliet li qed jipproponi l-Gvern Laburista huma bidliet li jippermettu sistema ta’ ippjanar li ser tkun qed tiffavorixxi lill-iżviluppaturi.
Dawn il-bidliet imressqa jfissru li jekk il-Qorti tal-Appell ma tagħtix sentenza f’ħames xhur, l-iżviluppatur jista’ jibda x-xogħol fuq il-propjetà, u li s-sentenzi tal-Qorti li jiġu wara huma rrelevanti anke jekk wieħed jiddikjara li l-binja tkun illegali.
Intant, bosta kienu dawk in-nies li llum, propju l-ewwel ġurnata lura fil-Parlament wara l-waqfa tas-sajf, inġabru quddiem il-Parlament bħala protesta kontra dawn il-liġijiet il-ġodda tal-Ippjanar.
Liġijiet illi qed jagħtu aktar poter ukoll lill-Ministri.
Intant, il-Partit Nazzjonalista għadu jinsisti sabiex dawn il-liġijiet jiġu rtirati b’mod immedjat.
