Raġel ta’ 33 sena minn Ħal Tarxien ammetta li hedded u kkaġuna biża’ serju lill-partner tiegħu waqt argument li spiċċa f’atti ta’ vjolenza. Il-proċeduri nstemgħu quddiem il-Maġistrat Rachel Montebello, li semgħet kif fl-14 ta’ Settembru, il-koppja kellhom argument kbir li eskala malajr.
F’dak il-mument, l-akkużat waqqa’ lill-partner tiegħu fl-art, u kompla jżid mal-vjolenza psikoloġika billi insulentaha bi kliem degradanti, fosthom li sejħilha “prostituta”. L-aktar parti allarmanti kienet meta l-akkużat heddidha bil-mewt, u jgħidilha ċar u tond: “Noqtlok u nieħu lit-tifel.”
Fil-Qorti ġie ppreżentat rapport ta’ riskju ta’ periklu estrem, li enfasizza li l-imġiba tiegħu kienet tqajjem biża’ reali ta’ ħsara serja fuq il-vittma. Minkejja dan, meta tressaq quddiem il-Qorti, l-akkużat ammetta mill-ewwel l-akkużi kollha, u anki reġa’ kkonferma l-ammissjoni tiegħu matul il-proċeduri. Hu kien rappreżentat mill-avukat tal-għajnuna legali, Nadia Fyott.
Il-Maġistrat Montebello laqgħet it-talba tal-prosekuzzjoni biex tingħata ordni ta’ protezzjoni favur il-vittma, li tipprojbixxi kull forma ta’ kuntatt jew intimidazzjoni. Madankollu, ġiet permessa komunikazzjoni limitata biss dwar it-tarbija tagħhom, biex tiġi salvagwardjata l-kura u l-ġid tat-tifel.
Fl-istess ħin, il-Qorti ordnat ukoll projbizzjoni fuq il-pubblikazzjoni tal-ismijiet tal-partijiet sabiex tiġi protetta l-privatezza tal-familja. Fil-konklużjoni tagħha, il-Qorti kkundannat lill-akkużat għal multa simbolika ta’ €58, iżda l-ordni ta’ protezzjoni u l-konsegwenzi legali oħra juru l-gravità li biha l-Qorti qed tittratta dawn il-każijiet ta’ vjolenza domestika.
Il-Qorti wissiet lill-ħati biex ma jersaqx lejn il-vittma, iżda tagħtu aċċess għall-komunikazzjoni magħha biss permezz ta’ telefonati u messaġġi biss u dan dejjem għall-ġid tat-tifel tagħhom u fejn jidħol manteniment.
ll-prosekuzzjoni kienet immexxija mill-Ispettur Sherona Buhagiar.
