Analiżi | Medja ta’ aktar minn 2.5 gowls ġew skorjati s’issa f’kull logħba tal-Malta Premier

Wara li l-bieraħ intemmet match day 6 tal-Malta Premier, issa ninsabu f’nofs triq qabel ma nkunu nafu min se jkunu dawk it-timijiet li se jilgħabu mal-ewwel sitta u mal-aħħar sitta tal-Opening Round, fit-tieni fażi ta’ dan l-ewwel rawnd minn tnejn. Permezz ta’ dan l-artiklu riċerkat, Christian Micallef jiġbor punti ta’ interess u kurżitajiet, dwar il-Malta Premier s’issa wara l-ewwel sitt match days.

• S’issa kelna 36 partita mil-bidu tal-Malta Premier u b’kollox kelna total ta’ 91 gowl skorjat.

• Bħala medja, l-ammont ta’ gowls skorjati f’kull partita kien ta’ 2.53. 45% ta’ dawn il-gowls kienu skorjati fl-ewwel taqsima u 55% waslu fit-tieni nofs tal-logħba.

• Bl-ammont ta’ gowls irreġistrati s’issa, bħala medja kelna gowl skorjat kull 35 minuta.

• Mis-36 partita li kelna, f’sitt match days differenti tal-Malta Premier, kien hemm 19-il darba fejn tim tem mil-logħba mingħajr ma sofra gowl.

• Dan ifisser li l-perċentwal attwali li f’partita ż-żewġ timijiet rispettivi, jirnexxilhom jiskorjaw tal-anqas gowl kull wieħed, hu ta’ 56%.

• L-aktar skor komuni li kelna s’issa kien dak ta’ 1-1, bit-tieni l-aktar riżultat frekwenti, fit-tmiem ta’ partita, kien dak ta’ 2-0.

• Ix-xejra, dejjem skont ir-riżultati li kelna s’issa f’dawn l-ewwel 36 partita, hi li f’kull partita jkolna total ta’ żewġ gowls skorjati.

Il-klassifika attwali tal-Malta Premier wara li kull tim lagħab sitt partiti mil-bidu tal-Kampjonat.

• F’dawn l-ewwel 36 partita tal-Malta Premier, lagħbu total ta’ 283 differenti.

• F’kull partita, l-ammont medju ta’ xuttijiet lejn il-lasta avversarja, meta tiġbor taż-żewġ timijiet rispettivi f’daqqa, l-ammont sħiħ jammonta għal ftit inqas minn 16-il xutt f’kull logħba.

• Birkirkara u Ħamrun Spartans irreġistraw erba’ clean sheets, iġifieri ma soffrew ebda gowl f’partita, f’dawn l-ewel sitt logħbiet tal-Malta Premier.

• Tarxien Rainbows, Naxxar Lions u Żabbar St Patrick huma l-uniċi tliet timijiet mit-12 tal-Malta Premier, li għadhom iridu jirreġistraw l-ewwel clean sheets tagħhom tal-istaġun.

• Il-gowlkipers Miguel Angel Martinez ta’ Birkirkara u Henry Bonello ta’ Ħamrun Spartans, huma l-aktar tnejn li rrnexxilhom jilgħabu 90 minuta sħaħ bejn il-lasta, mingħajr ma jkunu megħluba. L-unika differenza bejn it-tnejn hi li l-Ispanjol ta’ Birkirkara lagħb is-sitt partiti kollha tal-Kampjonat, filwaqt li Bonello lagħab ħamsa minn sitt partiti ta’ Ħamrun Spartans.

• Bil-kontra, l-aktar tim li fl-ewwel sitt partiti tal-Malta Premier, kellu drabi fejn ma rrnexxilux jiskorja f’partita, huma Gżira United. Dawn id-drabi jammontaw għal erba’ partiti li matulhom, it-tim taħt il-gwida teknika ta’ Clive Mizzi, naqqset milli ssib il-lasta tul id-90 minuta sħaħ ta’ logħba.

• Hibernians huma l-uniċi, mit-12-il tim tal-Malta Premier, li skorjaw f’kull logħba.