L-Eks Kummissarju tal-Pulizija Lawrence Cutajar xehed fil-Qorti li kien uża t-talba ta’ għajnuna mingħand id-‘dealer’ tal-karozzi Edgar Brincat, magħruf bħala il-Ġojja, bħala opportunità biex jikseb informazzjoni dwar każijiet oħra.
Ix-xhieda tiegħu saret waqt il-proċeduri kriminali relatati li fihom Brincat u bintu, it-tabiba Stephanie Brincat, qed jiffaċċjaw akkużi marbuta ma’ ċertifikat mediku, każ li ħareġ fil-kuntest tal-inkjesta dwar ‘leaks’ minn uffiċjali pubbliċi relatati mal-investigazzjoni tal-qtil ta’ Daphne Caruana Galizia.
Cutajar xehed dwar il-kuntatti tiegħu ma’ Brincat u ċ-ċirkostanzi li wasslu biex spiċċa quddiemu ċertifikat mediku f’ismu. Cutajar, li kien Kummissarju tal-Pulizija bejn l-2016 u Jannar tal-2020, spjega li jaf lill-akkużat minn meta kien stazzjonat bħala Surġent u iktar tard bħala Spettur fid-distretti taż-Żejtun u Birżebbuġa, u li aktar tard reġa’ ltaqa’ miegħu meta kien Superintendant fl-Għassa ta’ Ħal Qormi.
Hu rrakonta li madwar Mejju tal-2019, Brincat ressaqlu talba għall-għajnuna wara li rċieva ċitazzjoni u wera t-tħassib tiegħu li kieku jiġi misjub ħati kien jitlef il-liċenzja tiegħu u b’hekk ix-xogħol tiegħu kien jimpatta kontrih.
Cutajar qallu biex jikkonsulta mal-avukat tiegħu, iżda stqarr mal-Qorti li f’dak il-mument “daħallu l-ħsieb” li seta’ juża din il-kwistjoni biex jikseb informazzjoni dwar każijiet oħra. Minn hemm ’il quddiem baqa’ jżomm kuntatt ma’ Brincat.
Qabel waħda mis-seduti tal-Qorti, Brincat qal lil Cutajar li kien marid u ma setax jattendi. Cutajar ftakar li qallu biex jara li jkollu ċertifikat mediku, u ftit jiem wara sab wieħed fil-kaxxa tal-ittri tiegħu. Huwa rrikonoxxa li kien jaf x’kien dak id-dokument u għaddieh lill-Uffiċċju Prinċipali taċ-Ċitazzjonijiet sabiex jiġi ppreżentat fil-Qorti. Cutajar sostna: “Fil-kundizzjonijiet li kont fihom, minkejja l-kritika, għamilt dak li kelli nagħmel.”
Il-Qorti staqsiet jekk l-Eks Kummissarju kellux jingħata twissija qabel ix-xhieda tiegħu, iżda l-Ispettur Prosekutur Shaun Friggieri qal li dan ma kienx il-każ peress li dak li kien se jixhed dwaru ma kienx qed jiġi investigat.
Ix-xhieda ta’ Cutajar saret fil-kuntest ta’ investigazzjonijiet usa’ dwar ‘leaks’ minn uffiċjali pubbliċi waqt l-inkjesta dwar il-qtil ta’ Daphne Caruana Galizia. Cutajar innifsu kien ġie suġġett ta’ skrutinju wara li ġie allegat li staqsa lil Brincat jekk kienx jaf fejn Melvin Theuma kien qed iżomm recording sigriet li jimplika lil Yorgen Fenech fil-komplott tal-qtil.
Jingħad li Brincat għadda din l-informazzjoni lil Theuma, li eventwalment spiċċa arrestat f’Novembru 2019 fi ħdan investigazzjoni dwar ħasil ta’ flus li ntużat bħala skema biex il-Pulizija tasal għand dawk ir-recordings.
Il-kawża qed issir quddiem il-Maġistrat Gabriella Vella. L-Ispettur Shaun Friggieri qed imexxi l-prosekuzzjoni, filwaqt li l-avukati Veronique Dalli u Dean Hili qed jidhru għal Stephanie Brincat, u l-avukat Stefano Filletti qed jidher għal Edgar Brincat. Id-difiża rriżervat id-dritt tagħha li tagħmel il-kontro eżami lil Cutajar f’seduta oħra.
