Il-Qorti, preseduta mill-Maġistrat Rachel Montebello, semgħet li d-Dipartiment tal-Ġustizzja Amerikan irid jintervista lil Shaukat Ali, negozjant Pakistan li għandu ċ-ċittadinanza Maltija u li hu maħsub li kien is-sid moħbi tal-maġġoranza tal-isħma ta’ Vitals Global Healthcare.
Ali kien tressaq il-Qorti f’Lulju li għadda akkużat b’korruzzjoni, ħasil ta’ flus u reati oħra relatati mal-ftehim tal-Vitals dwar il-privatizzazzjoni ta’ tliet sptarijiet tal-Istat, ftehim li l-qrati Maltin iddikjaraw bħala frawdolenti u annullawh. Huwa allegat li minn dan il-ftehim Ali għamel diversi miljuni ta’ ewro.
Matul il-kontinwazzjoni tas-seduta, l-avukat Shazoo Ghaznavi fakkar li meta kien tressaq il-Qorti din kienet ordnat lill-akkużat biex ma jiddiskutix il-każ jew id-dettalji tiegħu fil-pubbliku. Għalkemm id-Dipartiment tal-Ġustizzja Amerikan ma jistax jitqies bħala “pubbliku”, l-avukat żied li qabel jiltaqa’ mal-uffiċjali Amerikani, il-klijent tiegħu jkollu awtorizzazzjoni espliċita tal-Qorti.
Il-Qorti talbet dokumenti ta’ sostenn marbuta ma’ din it-talba u wissiet lill-akkużat biex jippreżenta rikors formali sabiex jakkwista l-permess meħtieġ. Intant, hu mifhum li l-uffiċjali Amerikani jridu jintervistaw lil Ali b’rabta ma’ investigazzjoni li għaddejja fl-Istati Uniti kontra Ralph de la Torre, CEO ta’ Steward Health Care, u l-Eks CEO ta’ Steward Malta, Armin Ernst.
Steward kienet ħadet f’idejha l-kuntratt tal-isptarijiet ta’ Vitals f’Malta qabel mal-qrati annullaw il-kuntratt, iżda l-kumpanija llum hija f’fażi ta’ falliment fl-Istati Uniti u qed tiġi investigata għal frodi, tixħim u korruzzjoni.
Il-provi miġbura mill-investigaturi Maltin fil-kawża juru x-xibka ta’ rabtiet ta’ Ali mal-ftehim tal-isptarijiet. Filwaqt li kien imqabbad bħala “konsulent” ta’ Vitals, martu kienet direttur tal-kumpanija Bluestone Investments, li kienet is-sid tal-Vitals, u ibnu kien qiegħed jaqla’ l-flus billi pprovda servizzi tal-IT u oħrajn lill-isptarijiet. Ali nnifsu kien ukoll ingħata kuntratt ta’ konsulent b’paga ta’ mitt elf ewro fix-xahar.
Ali mhux biss qiegħed jaffaċċja proċeduri kriminali iżda wkoll martu, Aasia Parveen, li hija mixlija b’ħasil ta’ flus, traffikar ta’ influwenza, serq, promozzjoni u parteċipazzjoni f’organizzazzjoni kriminali u korruzzjoni.
Fil-kawża dehru għall-Prosekuzzjoni l-Avukati Ġenerali Francesco Refalo, Rebekah Gatt u Shelby Aquilina, filwaqt li l-akkużat kien assistit mill-avukati Shazoo Ghaznavi u Jessica Formosa.
