Missier ta’ 49 sena ngħata sentenza sospiża wara li ammetta li hedded li joqtol lil ibnu u lill-ġenituri li qed jiffosterjawh waqt żjara taħt superviżjoni, waqt li ħebb ukoll għal ‘social worker” responsabbli biex jimmonitorja l-inċident.
Il-każ seħħ fis-18 ta’ Settembru meta l-akkużat irrabja wara li nnota li wieħed minn uliedu kien ġarrab xi ġrieħi. L-Ispettur Sarah Kathleen Zerafa xehdet kif il-missier, f’nofs il-qilla tiegħu, qal lill-ħaddiem tal-aġenzija Appoġġ li jekk hu ma setax “jigawdi” lil ibnu, ħaddieħor ma kellu jgawdih.
Huwa kompla b’theddid diretti lejn il-ġenituri foster, saħansitra jagħmel referenza għall-qtil doppju fil-Baħrija li kien seħħ f’Lulju, meta żewġ irġiel inqatlu f’għalqa. Il-missier kien ilu jilmenta dwar il-kura li jingħata lit-tifel mill-ġenituri foster, fosthom dwar li kienu ddeċidew li jiżbgħu x-xagħar tat-tifel.
Barra minn hekk, sostna li kien hemm żjarat oħra li ġew imħassra mingħajr ma kien ippreżentat ċertifikat mediku. Dawn l-ilmenti u t-theddid wasslu biex il-ħaddiema soċjali rrappurtaw lill-pulizija, li arrestaw lill-missier l-għada.
Huwa tressaq il-qorti akkużat li insulta u hedded lill-impjegata ta’ FSWS Appoġġ, li xekkel il-ħidma tal-aġenzija, li beżża’ lill-carer u li hedded lil ibnu stess. Barra minn hekk, tressqu kontrih ukoll akkużi ta’ ksur ta’ żewġ deċiżjonijiet ta’ libertà proviżorja, waħda tal-2018 u oħra tal-2024.
Għalkemm fil-bidu wieġeb mhux ħati, aktar tard bidel il-pożizzjoni tiegħu u ammetta l-akkużi. Il-Maġistrat Yana Micallef Stafrace, wara li semgħet ix-xhieda u l-ammissjoni, ikkundannatu għal sentejn ħabs sospiżi għal erba’ snin.
Barra minn hekk, ordnat il-konfiska ta’ elf ewro mid-depożitu tal-libertà proviżorja tiegħu, li ngħataw lill-Istat. Il-qorti imponiet ukoll ordni ta’ trattament għal tliet snin u ordni ta’ protezzjoni favur il-ħaddiema soċjali, it-tifel u l-ġenituri foster.
Il-prosekuzzjoni tmexxiet mill-Ispettur Sarah Kathleen Zerafa, filwaqt li l-avukati Franco Debono u Adreana Zammit dehru għall-akkużat.
