Raġel ta’ 25 sena mill-Eritrea se jitressaq il-Qorti l-Ħadd għall-ħabta tal-kwarta ta’ waranofsinhar, wara li kien involut f’argument li seħħ biswit ħanut fil-Marsa.
Dan l-argument seħħ is-Sibt filgħodu għall-ħabta tas-seigħa u nofs ta’ filgħodu, fi Triq Balbi, il-Marsa, bejn żewġt irġiel mill-Eritrea ta’ 22 sena u 25 sena rispettivament.
Waqt l-argument allegatament intużat arma li taqta’ u bil-ponta b’konsegwenza li r-raġel ta’ 22 sena u raġel ieħor mill-Eritrea ta’ 32 sena li prova jwaqqaf l-argument, ġarrbu xi ġrieħi.
Fuq il-post issejjaħ tim mediku li ta għajnuna medika liż-żewġ persuni fejn ftit tal-ħin wara ttieħdu permezz t’ambulanza lejn l-Isptar Mater Dei.
Aktar tard, ir-raġel ta’ 22 sena kien iċċertifikat bi ġrieħi gravi filwaqt li r-raġel ta’ 32 ġarrab ġrieħi ħfief.
Intant, ir-raġel ta’ 25 sena qed jinżamm mill-Pulizija sabiex jassisti fl-investigazzjonijiet li għadhom għaddejjin, fejn huwa mistenni li jistressaq il-Qorti għall-ħabta tal-kwarta ta’ waranofsinhar quddiem il-Maġistrat Joseph Gatt.
