Lokali • Qorti

Turist mixli li mess mara b’mod indiċenti f’Paceville

7 ta' Ottubru 2025

Raġel ta’ 26 sena li jinsab Malta bħala turist wieġeb mhux ħati għall-akkużi li allegatament mess b’mod indeċenti mara f’Paceville, fil-klabb Footloose. L-imputat, Jason Tran, turist Ġermaniż, tressaq il-Qorti akkużat li wettaq atti sesswali mingħajr il-kunsens tal-vittma, li soġġettaha għal intimità fiżika u ġesti b’konnotazzjoni sesswali. Hu kien akkużat ukoll li kkaġuna ġrieħi ħfief lis-sieħeb tal-mara u li kien fis-sakra f’post pubbliku.

L-Ispettur Dylan Pace spjega lill-Qorti li fil-lejl tal-Ġimgħa, il-Pulizija kienu msejħa sabiex jintervjenu f’argument fil-klabb Footloose. Meta waslu fuq il-post sabu lit-turist Ġermaniż b’wiċċu mgħotti bid-demm. L-investigazzjonijiet preliminari wrew li kien attakkat minn koppja, iżda aktar inkjesti allegatament żvelaw li fil-ħin li s-sieħeb tal-mara kien fil-kamra tal-banju, l-imputat kien mess b’mod indeċenti lill-mara.ta

Il-mara, li rrakkuntat kif kienet diġà sofriet abbuż sesswali fit-tfulija tagħha, qalet li staqsitu għaliex messha u l-akkużat wieġeb b’ċaqliq ta’ spallejh, bħal donnu kien indifferenti. Hija wissietu li kienet se tgħid lis-sieħeb tagħha u meta dan sar jaf, qabeż fuq Tran u tah daqqiet li kkawżawlu ġrieħi serji. Fil-fatt, l-imputat kellu bżonn kura medika u ttieħed l-isptar, qabel deher il-Qorti b’żewġ għajnejn imbenġlin.

Il-koppja kienu ġew akkużati separati l-għada, is-Sibt, u ammettew li sawwtuh. Il-Qorti kkundannathom sentejn ħabs sospiżi għal erba’ snin. Meta Tran deher il-Qorti t-Tlieta wara nofs inhar, huwa ċaħad l-akkużi kontrih iżda l-Qorti rrifjutat it-talba tiegħu għall-ħelsien mill-arrest

Huwa tressaq quddiem il-Maġistrat Charmaine Galea. Il-prosekuzzjoni tmexxiet mill-Avukat Krista Spiteri Lucas mill-Uffiċċju tal-Avukat Ġenerali assistit mill-Ispettur Dylan Pace. L-Avukat Kris Balzan deher għall-akkużat.

..