Il-Qorti Kriminali qieset nota ppreżentata mill-akkuzat Yorgen Fenech bħala “kważi theddida” fil-konfront tagħha, wara li l-imprenditur esprima t-tħassib tiegħu li d-dritt għal smigħ ġust qed jiġi kompromess. Fenech, li qed jaffaċċja akkużi ta’ kompliċità fil-qtil tal-ġurnalista Daphne Caruana Galizia fl-2017, ressaq din in-nota permezz tal-avukati tiegħu wara li l-Qorti ċaħdet numru ta’ talbiet tad-difiża biex jinstema’ aktar xhieda u jinkiseb aktar provi.
Il-Qorti osservat li ħafna minn dawn it-talbiet kienu mmirati biex ittawlu l-proċess. Fil-kontenut tan-nota, Fenech insista li l-prinċipju tal-ugwaljanza ma kienx qed jiġi rrispettat, u wissa li dan jista’ jikkomprometti d-dritt tiegħu għal ġuri ġust.
L-Imħallef Edwina Grima, waqt is-seduta fil-jum tal-Erbgħa, informat lill-prosekuzzjoni bil-kontenut tan-nota u saħqet li din kienet “kważi theddida” lill-Qorti. Hija qalet li l-proċeduri se jkomplu kif ippjanat, sakemm ma jkun hemm l-ebda deċiżjoni kuntrarja mill-Qorti Kostituzzjonali.
Fenech, li qed jiċħad l-akkużi miġjubin kontrih, qal li għandu l-intenzjoni li jfittex rimedju quddiem il-Qorti Kostituzzjonali, billi jsostni li nkisru d-drittijiet fundamentali tiegħu. Il-każ, wieħed mill-aktar prominenti fl-istorja kriminali ta’ Malta, jiffoka fuq il-parti allegata ta’ Fenech fil-kordinazzjoni tal-assassinju ta’ Caruana Galizia barra d-dar tagħha fil-Bidnija f’Ottubru tal-2017.
S’issa, il-proċess ra wkoll żviluppi importanti oħra. Fosthom li l-aħwa Alfred u George Degiorgio ammettew li huma kienu dawk li poġġew u attivaw il-bomba, u ġew ikkundannati b’40 sena ħabs kull wieħed.
Vince Muscat, magħruf bħala il-Koħħu, ammetta wkoll u ngħata 15-il sena ħabs wara ftehim mal-awtoritajiet u xehed kontra persuni oħrajn. Aktar kmieni din is-sena, Robert Agius u Jamie Vella nstabu ħatja li pprovdew l-isplussiv u ġew ikkundannati wkoll.
Il-prosekuzzjoni qed titmexxa mill-avukati Anthony Vella, Godwin Cini u Danika Vella mill-Uffiċċju tal-Avukat Ġenerali. L-avukati Charles Mercieca u Gianluca Caruana Curran qed jiddefendu lil Fenech, filwaqt li l-avukati Jason Azzopardi u Therese Comodini Cachia qed jidhru għall-familja tal-vittma.
