€508,225.
Din kienet is-somma finali miġbura mill-Partit Nazzjonalista waqt il-maratona tal-Ħadd – maratona li kienet l-ewwel waħda li ġiet organizzata minn meta Alex Borg kien elett Kap tal-Partit Nazzjonalista.
Il-Kap tal-Partit Nazzjonalista ħabbar li 1% tas-somma miġbura se tkun qed tingħata lil żewġ għaqdiet li jieħdu ħsieb il-kura tas-Saħħa Mentali.
Maratona li matulha l-Kap tal-Partit Nazzjonalista Alex Borg tkellem dwar kif flimkien mat-tim ta’ Deputati tiegħu kommessi li jindirizzaw l-isfidi li qed iħabbat wiċċu magħhom il-pajjiż – flimkien, bħala Gvern alternattiv u b’saħħtu.
Waqt intervista li saritlu matul ix-xandira tal-Ħadd, Alex Borg spjega diversi proposti li l-Partit Nazzjonalista qed ikompli jfassal bil-għan li jirrifletti l-polz tal-poplu; fost l-oħrajn f’dak li għandu x’jaqsam maż-żieda fil-popolazzjoni, it-traffiku, l-għoli tal-ħajja u l-ambjent.
Il-Kap tal-Partit Nazzjonalista sostna wkoll li hekk kif ninsabu fuq l-għatba tal-budget, huwa insista kif il-Gvern għandu mhux biss iħares il-pajsaġġ ta’ madwarna iżda jagħti appoġġ lill-ħaddiem, fost l-oħrajn billi jelimina t-taxxa minn fuq il-COLA.
Intant f’intervista separata li saritlu aktar tard matul ix-xandira, il-Kap tal-Partit Nazzjonalista Alex Borg flimkien ma’ Sarah Bajada, sostna kif l-aħħar ġimgħat offrew jiem impenjattivi u ta’ sagrifiċju; madanakollu kienu ġimgħat ta’ sodisfazzjon li laqqgħuh ma’ mijiet ta’ nies li lesti jaħdmu għal ġid tal-pajjiż.
Sarah Bajada insistiet li għalkemm kienu jiem differenti u impenjattivi ferm, xorta waħda tammira l-fatt li Alex Borg isib ħin għal kollox – fejn minkejja l-impenji qed isib bilanċ bejn il-ħin tal-familja u l-kuntatt kontinwu man-nies li ma jieqaf qatt.
Finalment il-Kap tal-Partit Nazzjonalista Alex Borg irringrazzja lil Sarah talli dejjem sabha bħala spalla soda, bastun li mingħajrha ċertament ma jkunx jista’ jwettaq dak li qed iwettaq b’serħan il-moħħ, sostenn u mħabba.
