“Sarah hija determinanti għalija li fiha nsib spalla soda għat-traġit li qbadna.”
Sostna dan il-Kap tal-Partit Nazzjonalista Alex Borg f’intervista li saritlu matul ix-xandira tal-Ħadd filgħaxija hekk kif flimkien ma’ Sarah Bajada spjega kif fl-aħħar xhur ħajjithom inevitabbilment inbidlet ta’ taħt fuq.
Madanakollu b’determinazzjoni u bilanċ qed jirnexxielhom ilaħqu ma’ affarijiet kemm ta’ partit kif ukoll tal-ħajja ta’ kuljum hekk kif xorta waħda huma koppja bħall-oħrajn.
Alex Borg saħaq li s’intendi ħajja ta’ Kap tal-Oppożizzjoni mhux normali fejn m’għandekx skeda iżda xorta waħda jrid isib mod kif isib ħin għal qraba tiegħu.
Huma saħqu kif iħossuhom xortihom tajba li flimkien qed jaqsmu din l-esperjenza mimlija emozzjonijiet u flimkien ikunu ta’ bastun għal xulxin.
Il-Kap tal-Partit Nazzjonalista saħaq li fil-ħajja dejjem ikun hemm l-ostakli iżda flimkien jingħeleb kull ostaklu li jkun hemm quddiemek, b’determinazzjoni, lealtà u rispett – filwaqt li għal darb’oħra rringrazzja lil Sarah Bajada tas-sapport u sostenn kontinwu li jsib minn għandha.
Intant, Sarah Bajada spjegat li nhar l-24 ta’ Ottubru se tkun qed torganizza l-ewwel attività bit-tema Beyond Pink proprju b’rabta għal Pink October.
Hija saħqet li l-għan min din l-attività se jkun li n-nisa jkunu konxji ta’ saħħithom u jisimgħu esperjenzi ta’ min ġarrab.
