Hekk kif il-Gvern qed ikompli jippersisti biex jibqa’ għaddej bil-liġijiet tal-ippjanar qerrieda li se jixħtu s-setgħa kollha f’idejn l-iżviluppaturi, il-kampanja Ġustizzja għal Artna qed issejjaħ lin-nies biex jerġgħu jingħaqdu fi protesta t-Tnejn, is-27 ta’ Ottubru. Il-protesta se tibda fil-5:30pm minn quddiem il-Qorti u tibqa’ miexja lejn il-Parlament.
Huma sostnew li la hija għażla tagħhom, u lanqas huwa xi gost u pjaċir tagħhom li jerġgħu joħorġu fit-toroq, iżda qalu li m’għandhom ebda għażla ħlief li jibqgħu jissieltu biex jwaqqfu din it-theddida kbira għall-kwalità ta’ ħajjitna u d-demokrazija. Huma ripetutament stqarrew li jippreferu jpoġġu madwar mejda u jiddiskutu r-riformi urġenti li pajjiżna għandu bżonn fil-qasam tal-ambjent u l-ippjanar. Madankollu, minkejja l-għajta tal-poplu għal ġustizzja — inklużi dawk l-eluf li s-Sibt, 4 ta’ Ottubru ħarġu jipprotestaw fit-toroq tal-Belt — il-Prim Ministru Robert Abela qed jibqa’ jirrifjuta li jisma’ lill-poplu.
L-hekk imsejħa “riforma” tal-ippjanar hija mannara mdendla fuq għonq in-nies. Il-fatt li l-protesta li jmiss se taħbat mal-jum li fih jiġi ppreżentat il-Baġit mhuwiex kumbinazzjoni. Il-messaġġ tagħhom huwa ċar: dan mhuwiex ‘business as usual’.
Iż-żewġ abbozzi tal-ippjanar u t-tliet avviżi legali jippreżentaw theddida imminenti għall-postijiet li huma l-aktar għal qalbna, għall-komunitajiet tagħna, għall-ġustizzja soċjali, u għad-demokrazija. Dawn se jżarmaw is-salvagwardji eżistenti kollha kontra l-iżvilupp bla rażan billi jneħħu s-saħħa effettiva tar-regolamenti tal-ippjanar u jagħtu kontroll assolut lill-Awtorità korrotta tal-Ippjanar. Id-dritt tal-pubbliku li jappella deċiżjonijiet illegali b’mod effettiv se jiġi severament limitat, u l-Qorti se titlef is-setgħa tagħha li tirrevoka permessi illegali. Barra minn hekk, l-avviżi legali se jagħtu amnestija totali għal kull xorta ta’ illegalità li saret sas-sena l-oħra, b’ebda limitu fuq it-tip, id-daqs jew il-post li fih saret.
Huma qalu li huma jemmnu bis-sħiħ li n-nies għandhom is-saħħa li jwaqqfu dan l-attakk fuq il-kwalità tal-ħajja tagħhom. Filwaqt li qed jerġgħu jtennu t-talba tagħhom lill-Prim Ministru Robert Abela biex jirtira immedjatament dawn il-liġijiet, huma qed jerġgħu jsejħu lill-pubbliku biex insaħħu din il-ġlieda kontra l-bullies ta’ dan il-pajjiż — dawk li jemmnu li l-flus jagħtuhom id-dritt li jirfsu fuq iċ-ċittadini komuni.
It-Tnejn 27 ta’ Ottubru, huma mistennija jerġgħu juruhom li huma mhux se jaċċettaw li jgħixu taħt il-ħakma tal-iżviluppaturi.
Għaqdiet:
- BirdLife Malta
- Din l-Art Ħelwa
- Flimkien għal Ambjent Aħjar
- Friends of the Earth Malta
- Front Żgħażagħ għall-Ambjent
- Għawdix
- Moviment Graffitti
- Nature Trust – FEE Malta
- Ramblers Association
- Wirt Għawdex
