Matul il-jum tal-Ħamis 16 t’Ottubru, li mmarka it-tmien anniversjarju mill-assassinju tal-ġurnalista Daphne Caruana Galizia – numru ta’ attivisti, ġurnalisti, qraba u persuni li b’xi mod jew ieħor Daphne ħalliet impatt fuq ħajjithom, fakkru il-memorja tagħha u x-xogħol ġurnalistiku tagħha permezz ta’ ċerimonja fl-istess ħin u post fejn ġiet assassinata fil-Bidnija.
Matul din iċ-ċerimonja li ġiet organizzata mill-organizzazzjonijiet, Repubblika u Occupy Justice, inqraw siltiet minn poeżiji sinonimi mal-ġurnaliżmu kif ukoll artikli li kienet tippubblika fuq il-blog personali tagħha. Attendew ukoll membri mill-Istitut tal-Ġurnalisti Maltin u PEN Malta kif ukoll numru ta’ ambaxxaturi u kummissarji.
Preżenti għal din iċ-ċerimonja kien hemm is-Segretarju Ġenerali tal-Partit Nazzjonalista Charles Bonello u l-President tal-Eżekuttiv tal-Partit Nazzjonalista, Joseph Grech.
Kien hemm preżenti anke ambaxxaturi li ingħaqdu mal-familja Caruana Galizia.
Aktar tard, il-qraba u n-neputijiet ta’ Daphne Caruana Galizia poġġew fjuri f’din iċ-ċerimonja mill-aktar emozzjonanti.
