Żagħżugħ ta’ 18-il sena, arrestat f’Paceville fl-2016 waqt rejd kontra d-droga f’bar, tpoġġa taħt ordni ta’ probazzjoni ta’ tlett snin wara li l-Qorti sabet li l-istqarrija tiegħu mal-Pulizija ma kinitx aċċettabbli u lliberatu minn akkużi ta’ traffikar, filwaqt li ġie kkundannat għal pussess aggravat ta’ ecstasy u pussess sempliċi ta’ kokaina.
L-inċident seħħ bejn l-1am u l-1:30am fil-30 ta’ Ottubru 2016 meta l-uffiċjali tas-squadra ta’ kontra d-droga waqqfu lill-akkużat hekk kif kien qed joħroġ minn “tiolet cubicle”. Huwa ġie ffrisskjat u saritlu ‘strip search’ fejn instabu €275 fuquy, 20 pillola blu- ecstasy moħbija fil-qalziet ta’ taħt tiegħu u pakkett trab abjad, li wara ġie kkonfermat li kien kokaina.
Tfittxija sussegwenti fid-dar tiegħu fiż-Żejtun wasslet biex instabu sitt pilloli oħra blu f’kexxun f’kamra tas-sodda. Il-farmaċista maħtur mill-Qorti kkonferma li l-pilloli kienu MDMA u l-powder kokaina. Il-punt ċentrali fil-każ kien id-deċiżjoni tal-Qorti li teskludi l-istqarrija tal-Pulizija, peress li dak iż-żmien il-liġi Maltija għadha ma kinitx introduċiet id-dritt għal assistenza legali waqt interrogatorju, li daħlet fis-seħħ fil-28 ta’ Novembru 2016.
B’mod konsistenti mal-prinċipji kostituzzjonali lokali u tal-Qorti Ewropea tad-Drittijiet tal-Bniedem dwar il-ġustizzja ġenerali tal-proċeduri, il-maġistrat qies li l-istqarrija kienet inadmissibbli minħabba l-età żgħira tal-akkużat u l-qafas legali ta’ dak iż-żmien.
B’hekk, mingħajr l-istqarrija, il-prosekuzzjoni ma kellhiex prova diretta li tikkonferma traffikar: ma kien hemm l-ebda xhieda li rriportat bejgħ, l-ebda xerrej, u l-ebda evidenza ta’ distribuzzjoni fil-post. Il-Qorti għalhekk ħelset lill-akkużat minn traffikar.
Fir-rigward tal-akkużi l-oħra, il-Qorti ma aċċettatx il-kwistjoni tal-akkużat li xtara kwantità kbira ta’ pilloli biss għax “sibhom irħas” u kellu l-intenzjoni li jikkonsmahom matul il-weekend. Il-kwantità tal-pilloli, il-flus li kien iġġorr miegħu, fil-qalziet ta’ taħt u l-ambjent tal-klabb wasslu biex il-Maġistrat tikkonkludi li l-ecstasy ma kienx għall-użu personali biss, u għalhekk instab ħati ta’ pussess aggravat. Il-kokaina, min-naħa tagħha, wasslet għal konvizzjoni separata għal pussess sempliċi.
Matul il-proċess, l-akkużat kien rreferut lill-Bord ta’ Riabilitazzjoni, li kkonferma li tlesta b’suċċess il-programm ta’ riabilitazzjoni. B’kunsiderazzjoni tar-rekord kriminali nadif tiegħu, il-koperazzjoni u l-isforzi ta’ riforma, il-Qorti għażlet ordni ta’ probazzjoni ta’ tlett snin minflok il-ħabs.
Id-difiża kienet imexxija mill-avukati Franco Debono, Marion Camilleri u Adreana Zammit, u l-maġistrat li presediet il-każ kienet Caroline Farrugia Frendo.
