Il-Qorti tal-Appell Kriminali, preseduta mill-Imħallef Consuelo Scerri Herrera, ħassret is-sentenza sospiża imposta fuq iż-żagħżugħ Juliano Dine, ta’ 19-il sena, u ordnat li l-każ tiegħu jerġa’ jinstema’ mill-ġdid quddiem il-Qorti tal-Maġistrati ta’ Għawdex.
Il-Qorti kkonkludiet li l-ammissjoni tal-akkużat ma kinitx waħda “unconditional” u għalhekk kienet legalment invalida. Il-każ imur lura għall-21 ta’ Mejju meta, waqt argument fi Triq ta’ Bullara, Xagħra, seħħet konfrontazzjoni bejn il-familja Dine – il-missier Ferdinand u ibnu Juliano – u l-aħwa Aleksander u Novi Marku, kollha ta’ nazzjonalità Albaniża.
Skont il-provi, il-familja Marku waslu fuq il-post b’żewġ vetturi u allegatament attakkaw b’mod aggressiv lill-missier u l-iben. Ferdinand Dine sofra ġrieħi gravi allegatament ikkawżati mill-aħwa Marku, filwaqt li Juliano Dine, biex jiddefendi lil missieru.
Meta ġie akkużat, Juliano Dine ma kellux interpretu u ma fehemx sewwa l-akkużi kontrih. Huwa ammetta li kkaġuna ġrieħi ħfief, kellu strument li jaqta’ jew jipponta b’mod illegali, u kkawża ħsara ta’ aktar minn €2,500 lill-karozza ta’ Marku.
Il-Maġistrat Brigitte Sultana kienet ikkundannatu għal sentejn ħabs sospiżi għal erba’ snin, multa ta’ €500, u ħlas ta’ danni lil partijiet terzi. Ġiet ukoll maħruġa ordni ta’ protezzjoni favur l-aħwa Marku. Separatament, l-aħwa Aleksander u Novi Marku qed jiffaċċjaw akkużi serji ta’ omiċidju involontarju ta’ Ferdinand Dine, filwaqt li Novi Marku biss qed jiffaċċja wkoll akkużi ta’ attentat ta’ omiċidju kontra Juliano Dine, sewqan perikoluż u ħsara intenzjonata. Huma ċaħdu l-akkużi kollha.
Fl-appell tiegħu, Dine sostna li l-ammissjoni tiegħu ma setax jitqies validu għaliex ma kienx wieħed assolut u mhux kundizzjonat. Huwa sostna li kien qed jaġixxi f’difiża tiegħu u ta’ missieru wara provokazzjoni minn Novi Marku. Il-Qorti tal-Appell sabet li l-ewwel Qorti naqqset mill-obbligu tagħha li tiżgura li l-ammissjoni kienet magħmula b’mod konxju u mingħajr kundizzjonijiet.
Fil-proċess tal-ewwel istanza kien hemm stqarrija ċara mill-avukat tad-difiża li “l-akkużat lest jammetti l-akkużi iżda qed isostni li kien qed jaġixxi fid-difiża tiegħu u ta’ missieru, kif ukoll wara provokazzjoni minn Novi Marku.” Skont il-Qorti tal-Appell, dan juri li l-ammissjoni ma kinitx ċara jew inekwivokabbli, iżda kienet kundizzjonata fuq il-preżunzjoni ta’ difiża leġittima.
L-Imħallef Scerri Herrera enfasizzat li meta teżisti xi dubju dwar il-volontarjetà jew il-kjarifika tal-ammissjoni, dak id-dubju għandu jaħdem kontra l-ammissjoni u mhux favuriha. Għaldaqstant, id-dikjarazzjoni ta’ Dine li kien qed jaġixxi f’difiża personali kienet biżżejjed biex tneħħi kull ċertezza dwar il-validità legali tal-plea.
Il-Qorti għalhekk iddikjarat li l-proċeduri kollha quddiem il-Qorti tal-Maġistrati (Għawdex), mill-mument ta’ meta tressaq ’il quddiem, huma nulli u vojta. Is-sentenza mogħtija f’Marzu ġiet revokata, u l-Qorti ordnat li l-proċess jerġa’ jibda mid-dikjarazzjoni tal-akkużi, hekk kif jiġu kkonfermati fuq ġurament mill-Ispettur Prosekutur.
Fl-aħħar nett, il-Qorti tal-Appell iċċarat li Dine għandu jissejjaħ mill-ġdid quddiem il-Qorti tal-Maġistrati, iżda mhux taħt arrest, sabiex il-każ jinstema’ mill-ġdid b’mod regolari u skont il-liġi. Din id-deċiżjoni ttenni l-importanza tal-prinċipju li ammissjoni ta’ ħtija trid tkun ċara, volontarja u mhux kundizzjonata, u li kull dubju dwar l-għarfien jew il-volontà tal-akkużat għandu jmur favur il-proċess ġust u kontra l-validità ta’ dik l-ammissjoni.
