Taljan ta’ 45 sena – Roberto Conti, li m’għandux indirizz fiss f’Malta, ġie akkużat li wettaq serq sempliċi mis-supermarket Spar f’Ta’ Xbiex fi tliet okkażjonijiet differenti. Fil-Qorti, Conti daħaq meta wieġeb ħati għall-akkużi li seraq oġġetti ta’ valur totali ta’ madwar €110, fosthom żewġ fliexken alkoħol u laħam ikkapuljat.
Meta l-Maġistrat staqsietlu jekk kienx jaf għalxiex kien qed jammetti, huwa reġa’ tbissem bħala tweġiba. Il-Qorti semgħet li l-akkużat ibati minn dipendenza fuq l-alkoħol u li bħalissa m’għandux impjieg. L-Ispettur Elton Buckingham, li mexxa l-prosekuzzjoni, qal li l-imputat kien naqas iżda għandu bżonn ukoll għajnuna, u għalhekk talab li jingħata ordni ta’ trattament biex jiġi indirizzat il-problema ta’ alkoħoliżmu, flimkien ma’ piena ta’ ħabs.
Fil-kawża ġew ippreżentati wkoll filmati u ritratti li juru l-mumenti tal-istess serq. Ma saritx talba għall-ħelsien mill-arrest. Il-Qorti iddeċidiet li tagħti s-sentenza għall-5 ta’ Novembru fid-9:30 a.m. Il-prosekuzzjoni kienet immexxija mill-Ispettur Elton Buckingham, filwaqt li l-akkużat kien assistit mill-avukat Nadya Fiott tal-għajnuna legali.
