Mara ta’ 21 sena nstabet ħatja u ġiet ikkundannata ħames xhur ħabs wara li ammettiet li serqet ħwejjeġ u basktijiet. Il-mara, li ma tistax tissemmma b’ordni tal-Qorti, kienet ġiet arrestata aktar kmieni dan ix-xahar wara li allegatament kisret il-kundizzjonijiet tal-ħelsien mill-arrest tagħha, u minn dakinhar kienet tinsab taħt arrest preventiv.
Tard il-Ħamis filgħaxija, hija reġgħet tressqet il-Qorti akkużata bis-serqa ta’ ħwejjeġ u basktijiet fis-Swieqi, serqa li seħħet qabel ma nqabdet mill-pulizija aktar kmieni dan ix-xahar. Quddiem il-Qorti, l-imputata ammettiet ir-reati ta’ serqa, pussess ta’ oġġetti misruqa u ksur tal-kundizzjonijiet tal-ħelsien mill-arrest.
L-avukat tal-għajnuna legali Nadya Fiott enfasizzat li l-mara għandha bżonn għajnuna biex tegħleb id-dipendenza tagħha fuq id-droga, u żiedet tgħid li l-familja tagħha ma tatijhiex appoġġ, anzi kienet hi stess li introduċietha fid-dinja tad-droga.
Wara li semgħet is-sottomissjonijiet dwar is-sentenza, il-Qorti kkundannatha għal ħames xhur ħabs. Il-Maġistrat Joseph Gatt ħeġġegha tuża dan il-perjodu fil-ħabs biex tbiddel ħajjitha u tfittex direzzjoni ġdida. L-Ispettur James Turner mexxa l-prosekuzzjoni, filwaqt li l-avukat Nadya Fiott dehret għall-akkużata.
