Lejlet it-tieni partita għal Ħamrun Spartans fl-istadju ewlieni tal-UEFA Conference League, din id-darba kontra Lausanne-Sport tal-Iżvizzera, il-kowċ taċ-champions Maltin, Giacomo Modica reġa’ kien prudenti u kawt fil-kummenti tiegħu. It-tim Malti se jkun qed jilgħab illejla, f’dik li hi meqjusa bħala lejla storika fl-istorja tal-futbol Malti, għaliex se tkun l-ewwel partita li qatt intlagħbet f’Malta, fi stadju ta’ Kampjonat ta’ waħda mill-kompetizzjonijiet għall-klabbs tal-UEFA.
L-imġieba ta’ Modica, fil-mod ta’ kif jitkellem fil-konferenza stampa ta’ kwalunkwé partita li sal-lum lagħbu Ħamrun Spartans issa ndrat, u qed turi maturitá għaliex la tgħolli l-aspettativa tal-iskwadra iżda fl-istess waqt lanqas toqtol it-tama u l-kuraġġ tat-tim, minkejja li fil-partiti tal-kompetizzjonijiet Ewropej, Ħamrun Spartans qed jilagħbu kontra avversarji li fuq il-karta huma aħjar minnhom.
24 siegħa qabel jaffrontaw lit-tim Żvizzeru, li rebaħ f’match day 1 ta’ din il-kompetizzjoni kontra Breidablik tal-Iżlanda bl-iskor konvinċenti ta’ 3-0, Modica tkellem mingħajr ebda pressjoni. Hu saħaq li “f’kompetizzjoni bħal din, jeħtieġ li nuru li aħna kuraġġużi biżżejjed biex nitkejlu fuq l-istess livell tat-timijiet l-oħra, li fuq il-karta huma meqjusa aktar minna.”
Il-logħba ta’ kontra Lausanne-Sport se tkun l-ewwel waħda ta’ Ħamrun Spartans f’dan l-istadju li se tintlagħab fl-Istadium Nazzjonali f’Ta’ Qali. Il-Ħamruniżi kellhom bidu iebes f’din il-fażi tal-UEFA Conference League, meta f’match day 1, kontra Jagiellonia Bialystok tal-Polonja, f’Stadion Miejski, huma ġarrbu telfa minima ta’ 1-0, minkejja li taw wirja tajba u organizzata.
“Bdejna tajjeb f’din il-fażi. Ireidu nemmnu f’dak li qed nagħmlu u nifhmu wkoll li la darba rrnexxilna naslu sa dan l-istadju ta’ din il-kompetizzjoni, allura jfisser li anke aħna għadna l-preġji u l-pożittiv tagħna,” saħaq Modica.
Għall-partita a, jidher li Ħamrun Spartans se jkollhom il-plejers kollha disponibbli, u għaldaqstant dan il-fatt jaf iħalli lill-kowċ Sqalli inċert sal-aħħar fuq l-għażla tal-ewwel ħdax għal kontra t-tim mis-Super League Żvizzeru.
“Dejjem għandna fejn nitjiebu. Nistgħu nagħmlu dan biss, billi nkomplu naħdmu u nuru l-passjoni tagħna,” żied jgħid Modica.
Ħamrun Spartans kontra Lausanne-Sport tintlagħab illejla, fid-9pm fl-Istadium Nazzjonali f’Ta’ Qali.
